सरकारसँग हुने भनिएको वार्ता अनिश्चित भएपछि आन्दोलनरत शिक्षकहरूले शुक्रवार दिनभर जसो माइतीघर मण्डलामा बसेर विरोध जनाएका छन् ।

बुधवार र बिहीवार आक्रामक देखिएका शिक्षकहरू शुक्रवार भने अलि मत्थर देखिएका छन् ।

उनीहरूले माइतीघर मण्डलामा नाचगान गरेर समय व्यतीत गरेका छन् । अपरान्ह पानी परेपछि भने शिक्षकहरू तितरबितर भएका छन् ।

आन्दोलनरत शिक्षक महासंघ र सरकारबीच आज हुने भनिएको वार्ता अनिश्चित बनेको छ । दिउँसो ३ बजेसम्म वार्ता शुरु भएको छैन ।

वार्ता समिति गठनका लागि भन्दै महासंघको आन्दोलन परिचालन समितिको बैठक बसिरहेको छ । विद्यालय शिक्षालाई स्थानीय तहबाट मुक्त गर्नुपर्ने लगायत १७ बुँदे मागसहित शिक्षकहरू आन्दोलनमा छन् ।