चलचित्र ‘नाङ्गो गाउँ’ले बक्स अफिसमा राम्रो व्यापार गरेपछि निर्माणपक्षले यसको सिक्वेलको निर्माण घोषणा गरेको छ । चलचित्रका निर्माता हिमाल कडरिया र लेखक तथा निर्देशक दीपेन्द्र लामाबीच सिक्वेल बनाउने विषयमा सहमति भएको हो । 

‘अ पोलिटिकल कमब्याक अर्थात् एक राजनीतिक पुनरागमन’ ट्याग लाइनसहित चलचित्र ‘नाङ्गो गाउँ २’ निर्माणको घोषणा गरिएको हो । चलचित्रको सिक्वेलमा दयाहाङ राईले निर्वाह गरेको पात्र ‘पासाङ’ केही समयपछि गाउँ फर्किने कथालाई समावेश गरिनेछ । 

‘धेरै दर्शकले नायकको हार र पलायनमा दुःख व्यक्त गरेको पायौँ, उहाँहरूले दोस्रो भाग चाहियो पनि भन्नुभएको छ,’ निर्माता कडरियाले भने, ‘हामीले पहिलो भागको छायांकनको दौरानमै दोस्रो भागको परिकल्पना गरेका थियौँ । अहिले सबैतिरबाट दोस्रो भागको माग आएकाले हामीले यसको योजनालाई अगाडि बढाउने निर्णयमा पुगेका हौँ ।’ 

चलचित्रका लेखकसमेत रहेका निर्देशक लामाले दोस्रो भागको कथा पहिल्यै लेखिसकेका छन् । उनले भने, ‘अहिले चलचित्रको कथा जहाँ टुंगिन्छ, त्यो वास्तवमा मध्यान्तर थियो । पटकथामा परिणत गर्दै जाँदा कथा लामो हुनपुग्यो र हामीले दुई भागमै बनाउने सोच्यौँ ।’ 

दोस्रो भागको कथामा के हुन्छ त ? भन्ने प्रश्नमा निर्देशक लामाले भने–‘गाउँमा जरीको आतंकबाट गाउँलेहरू वाक्क हुन्छन् । र, जरीबाट पीडित गाउँलेहरू काठमाडौं गएर पासाङलाई गाउँ फर्काउँछन् । पासाङ गाउँ फर्केर जरीका खराब गतिविधिलाई रोक्ने संघर्षमा होमिन्छ ।’ 

निर्माता कडरियाका अनुसार ‘नाङ्गो गाउँ–२’को छायांकन एक वर्षपछि मात्र हुनेछ । त्यसअघि उनले निर्देशक लामालाई नै लिएर अर्को कमेडी चलचित्र बनाउने तयारी गरेका छन् । ‘चलचित्र ‘नाङ्गो गाउँ’बाट म सन्तुष्ट छु, त्यही भएर मैले दीपेन्द्रजीसँगको सहकार्यलाई निरन्तरता दिन लागेको हुँ,’ निर्माता कडरियाले भने । 

तिहारपछि छायांकनमा जाने नाम जुराउन बाँकी उक्त कमेडी चलचित्र दीपेन्द्र लामाकै लेखन रहनेछ । यसमा ‘नाङ्गो गाउँ’कै टिम दोहोरिने सम्भावना छ । चलचित्रको कलाकार र प्राविधिक टिमको बारेमा केही दिनपछि जानकारी दिने निर्माण टोलीको तयारी छ । निर्देशक लामाले भने–‘यो मेरो पहिलो पूर्ण रुपमा कमेडी समावेश गरिएको चलचित्र हुनेछ । यसपटक दर्शकलाई दुई घन्टा लगातार हँसाउनु मेरो लक्ष्य रहनेछ ।’