११ साउन २०८३, सोमबार
कांग्रेस महामन्त्री गगन थापाले देश संकटमा नरहेको बताएका छन् ।
सोमवार पार्टी केन्द्रीय समिति बैठकमा बोल्दै महामन्त्री थापाले स्थानीय तह, प्रदेश र केन्द्रमा पहिलो पार्टी बनेको कांग्रेसले देश संकटमा पर्यो भनेर भन्न नहुने बताएका हुन् ।
‘गुनासो छ, देश संकटमा छ । देशको स्थिति राम्रो छैन । तर, यस्तो मात्रै होइन, संविधान बनायौं, ठूलो दल भयौं, ३३२ वटा तहमा हामी छौं । सात प्रदेशमा सकार र मुख्यमन्त्रीमा छौं । अलि पछि प्रधानमन्त्री बन्दै हाम्रो हातमा हुनेछ,’ थापाले भने, ‘त्यसैले देश संकटमा छैन । हाम्रो जिम्मामा छ । सुशासन र डेलिभरीको कुरा तथा मानक बनाएकाले हाम्रो आलोचना भएको छ । आन्दोलनको बेला यस्तो कुरा हेरिँदैन तर अब हेरिन्छ ।’
राष्ट्रपतिले विवादित व्यक्तिलाई माफी दिएको, गुट नमिल्दा प्रदेशमा मन्त्रालय फुटाउने काम भएको आदि कारणले आलोचना बढेको उनको भनाइ छ ।
ध्यान नदिँदा समस्या आएको भन्दै उनले नैतिक कसीमा सभापति मात्रै नभई सबै नेता कार्यकर्ता तयार हुनुपर्ने बताए ।
‘नैतिक हिसाबले उभियौं, शासन भएको ठाउँमा डेलिभरी दियौं भने कुनै कुराले तलमाथि गर्न सक्दैन,’ थापाले भने ।
शिक्षक खुशी नभएसम्म शिक्षा नसुधारिने उनले बताए ।
