०८ साउन २०८३, शुक्रबार
औषधि व्यवसायी संघ (एनसीडीएस) उदयपुरका महासचिव वीरेन्द्रकुमार झाले फार्मेसीबाट लागुऔषध बनाएर बेच्ने गरेको खुलेको छ ।
झाले उदयपुरको चौदण्डीगढी नगरपालिका – ७ मा रहेको गोपीकृष्ण मेडिकल हल तथा औषधिको होलसेल पसलबाट औषधिको अनुचित प्रयोग गर्दै लागुऔषध प्रयोगकर्तालाई बिक्री गर्ने गरेको खुलेको हो ।
गत भदौ २ गते इलाका प्रहरी कार्यालय बेलटारले उदयपुरको चौदण्डीगढी नगरपालिका – ७ मा गोपीकृष्ण मेडिकल हल औषधिको होलसेल पसलमा छापा हानेर ठूलो परिमाणमा औषधि बरामद गरेको थियो ।
उनले लागुऔषध प्रयोगकर्तालाई अनुचितरूपमा औषधि बिक्री–वितरण गर्ने गरेको पाएपछि प्रहरीले छापा हानेर ट्रामाडोल र डाइसाइक्लोमाइन नामको औषधि दुई कार्टुन बरामद गरेको जिल्ला प्रहरी कार्यालय उदयपुरले जनाएको छ ।
औषधिसँगै प्रहरीले उनलाई पनि नियन्त्रणमा लिएकाे थियाे । तर पक्राउ परेपछि उनी बिरामी परेका थिए ।
निको भएपछि बिहीवार पक्राउ गरी थप कारवाहीको लागि औषधि व्यवस्था विभाग विराटनगरमा बुझाइएको प्रहरीले जनाएको छ ।
यसअघि पनि २०७८ जेठ २० गते झालाई औषधि व्यवस्था विभागले औषधिको अनुचित प्रयोग गरी लागुऔषध प्रयोगकर्तालाई बिक्री वितरण गरेको सूचनाका आधारमा पक्राउ गरेको थियो ।
झाले प्रिगाभालिन, ट्रामाडोल र डाइसाइक्लोमाइन नामको औषधि लागुऔषध प्रयोगकर्तालाई बिक्री–वितरण गरेका छन् ।
क्यान्सरको समस्या भएकालाई दुखाई कम गर्न प्रयोग गरिने ट्रामाडोलले अरू औषधिसँग मिसाएर सेवन गर्दा लागुऔषधको काम गर्ने स्वास्थ्यकर्मीहरू बताउँछन् ।
प्रिगाभालिन नशा च्यापिएका बिरामीले प्रयोग गर्दछन् ।
यस्तै, ट्रामाडोल क्यान्सरका बिरामीले दुखाइ कम गर्न र डाइसाइक्लोमाइन औषधि दुखाइ कम गर्न बिरामीले सेवन गर्ने गरेको विभागले जनाएको छ ।
पटक–पटक पक्राउ पर्दै आएका झालाई औषधि व्यवस्था विभाग विराटनगरले सामान्य धरौटी रकम लिएर छोड्ने गरेको छ ।
औषधि व्यवस्था विभाग विराटनगरका प्रमुख टेकेन्द्र मिश्राले पछि मुद्दा चलाउने भन्दै झालाई बिहीवार ५० हजार रुपैयाँ धरौटी रकम तोकेर छोडेका छन् ।
औषधि व्यवस्था विभागले औषधि ऐन २०३५ अनुसार वारदात भेटिए जिल्ला अदालतमा म्याद थप गरी हिरासतमा राखेर अनुसन्धान गर्नु पर्ने उल्लेख छ ।
अनुसन्धान पूरा भएपछि जिल्ला सरकारी वकिलसँग राय लिएर अदालतमा अभियोग दर्ता हुन्छ । त्यसपछि अदालतमा थुनछेक बहसपछि आदेश हुने गर्छ ।
औषधि ऐन २०३५ को दण्ड सजायका (३) उपदफा (१) र (२) मा औषधिको अनुचित प्रयोग गरेको पाइएमा १ वर्ष कैद र पाँच हजार रुपैयाँ जरिवाना हुने व्यवस्था छ ।
तर विभागले झाको हकमा ५० हजार रुपैयाँ धरौटी लिएर मुद्दा पछि चलाउने भन्दै तारेखमा राखेर छोडेको पाइएको हो ।
औषधि व्यवस्था विभाग विराटनगरका प्रमुख टेकेन्द्र मिश्राले औषधिको अनुचित प्रयोग गर्ने झालाई पछि मुद्दा पनि चलाउने बताए । ‘अहिले धरौटीमा तारेखमा राखेर छोडिएको हो,’ उनले भने, ‘हामीलाई व्यवहारिक कठिनाइ पनि रहेको छ ।’ पर्याप्त जनशक्ति र साधन स्रोत पनि नभएको कारणले केही समस्या आएको उनले बताए ।
‘हामीले कारवाही गर्नबाट जोगाएको भने होइन,’ उनले भने ।
