२४ जेठ २०८३, आइतबार
भारतमा जारी एकदिवसीय क्रिकेट विश्वकपमा दक्षिण अफ्रिकाले दिएको ‘कीर्तिमानी’ लक्ष्य पछ्याउन नसकेपद्धि श्रीलंका भारी अन्तरले पराजित भएको छ ।
दिल्लीमा शनिवार राति सकिएको खेलमा श्रीलंका दक्षिण अफ्रिकासँग १०२ रनले पराजित भएको हो ।
दक्षिण अफ्रिकाले दिएको ४२९ रनको ‘कीर्तिमानी’ विशाल लक्ष्य पछ्याएको श्रीलंका ४४.५ ओभरमा अलआउट हुन पुगेको थियो । यद्यपि, श्रीलंकाले ३२६ रन बनाउन सक्यो । तर, जीतका लागि यो पर्याप्त भएन ।
श्रीलंकाका ३ खेलाडीले अर्धशतक बनाएका थिए । चारिथ बसालान्काले सर्वाधिक ७९, कुशल मेन्डिसले ७६ र कप्तान दसुन शानाकाले ६८ रन जोडे ।
दक्षिण अफ्रिकाका जेराल्ड कोइट्जीले सर्वाधिक ३ विकेट लिए ।
यसअघि टस हारेर ब्याटिङको निम्तो पाएको दक्षिण अफ्रिकाले श्रीलंकालाई ४२९ रनको ‘कीर्तिमानी’ विशाल लक्ष्य दिएको थियो । आफ्ना ३ खेलाडीले शतक हानेपछि दक्षिण अफ्रिकाले ४२९ रनको विशाल लक्ष्य दिन सफल भएको हो ।
दक्षिण अफ्रिकाले पूरै ओभर खेल्दै ५ विकेटको क्षतिमा ४२८ रन बनाएको हो । यो योगफल विश्वकप इतिहासकै उच्च हो ।
दक्षिण अफ्रिाकाका रसी भान डेर डुसेन, उइडेन मार्करम र क्लिन्टन डी ककले शतकीय पारी खेलेका हुन् । डुसेनले १०८, मार्करमले १०६ र ककले १०० रन बनाएका हुन् ।
यस खेलमा ३ वटा कीर्तिमान बनेका थिए । पहिलो– विश्वकप इतिहासमा पहिलो पटक एकै खेलमा ३ शतक प्रहार । दोस्रो– धेरै योगफल बन्नु । तेस्रो– मार्करमले विश्वकप इतिहासकै सर्वाधिक छिटो ४९ बलमा शतक गर्नु ।
मार्करम खेलको उत्कृष्ट खेलाडीसमेत घोषित भए ।
