२२ जेठ २०८३, शुक्रबार
प्रतिनिधिसभाको बैठक १६ दिनपछि बस्नेगरी स्थगित भएको छ ।
शुक्रवार बसेको प्रतिनिधिसभा बैठकको अन्तिममा सभामुख देवराज घिमिरेले कात्तिक १२ गतेसम्मको लागि बैठक स्थगित गरेका हुन् ।
दशैंको घटस्थापना आइतवार शुरु हुँदैछ भने दशैंको टीका कात्तिक ७ गते छ । संसद्को बैठकबाटै सभामुख घिमिरेले दशैं, तिहार र छठको शुभकामना दिए ।
दशैं मान्न सांसदहरू गाउँ जाने भएपछि प्रतिनिधिसभाको बैठक लामो समयका लागि स्थगित गर्नुपरेको संसद् सचिवालयले जनाएको छ ।
यसअघि प्रधानमन्त्री पुष्पकमल दाहाल 'प्रचण्ड' संयुक्त राष्ट्र संघको महासभा र चीन भ्रमणमा गएको बेला १७ दिनको लागि स्थगित भएको थियो ।
१६ दिनको लागि बैठक स्थगित हुनुअघि प्रतिनिधिसभाले लगातार १० भन्दा बढी बैठकमा अनुपस्थित रहने सांसदको बिदा स्वीकृत गरेको छ ।
थेरापी चलिरहेको कारण देखाउँदै सांसद मनोरमा शेरचन पछिल्ला १६ वटा बैठकमा अनुपस्थित रहेकी थिइन् ।
यस्तै गृह जिल्ला भ्रमणमा रहेको भन्दै सांसद दयालबहादुर शाही ११ बैठकमा अनुपस्थित थिए ।
