चालू आर्थिक वर्ष २०८०/८१ को पहिलो दुई महिनामा वस्तु आयात र निर्यात दुवै घटेको छ ।

आयात र निर्यात घट्दा व्यापार घाटामा कमी देखिएको छ । नेपाल राष्ट्र बैंकले मंगलवार सार्वजनिक गरेको भदौ मसान्तसम्मको आर्थिक तथा वित्तीय स्थितिले व्यापार घाटा ४ दशमलव ७ प्रतिशत घटेको देखाएको हो । 

वस्तु निर्यात ७ दशमलव ८ प्रतिशतले कमी आई २६ अर्ब ४५ करोड कायम भएको छ । अलैँची पोलिस्टर धागो, जुसलगायत वस्तुको निर्यात बढेको छ भने ऊनी गलैँचा, सोयाबिन तेल र जुटका सामानको निर्यात घटेको छ । 

वस्तु आयात पनि ५ दशमलव १ प्रतिशतले कमी आई २५९ अर्ब ७५ करोड कायम भएको छ । 

विद्युतीय सामान लगायतका वस्तुको आयात बढेको छ भने पेट्रोलियम पदार्थ, कच्चा सोयाबिन तेल, कच्चा पाम तेल, औषधी, एम.एस.बिलेट लगायतका वस्तुको आयात घटेको नेपाल राष्ट्र बैंकले जनाएको छ । 

आर्थिक वर्षको पहिलो दुई महिनामा कुल वस्तु व्यापार घाटा ४ दशमलव ७ प्रतिशतले कमी आई २३३ अर्ब ३० करोड कायम भएको छ ।

दुई महिनाको अवधिमा रेमिट्यान्स आप्रवाह भने २२ दशमलव १ प्रतिशतले बढेको छ । 

हेर्नुहोस्, आर्थिक स्थितिको हाइलाइट्स: