२८ असार २०८३, आइतबार
काठमाडौं, ९ असोज — संसारकी सबभन्दा मोटी महिला इमान अहमदको निधन भएको छ । युएईको अबु धाबीमा उपचारका क्रममा सोमवार उनको मृत्यु भएको हो ।
एक हप्ताअघि मात्र ३७औं जन्मदिन मनाएकी इमान केही समयअघि भारतमा उपचार गराउँदै थिइन् ।
कुनै समयमा इमानको तौल ५०० किलो थियो ।
अबु धाबीको बुर्जील अस्पतालमा उपचार गराइरहेकी इमानको मिर्गौलाले काम गर्न छोडेको थियो र उनलाई मुटुको समस्या पनि थियो । बीसजना चिकित्सकको निरीक्षणमा उनलाई राखिएको थियो ।
इमान इजिप्टकी नागरिक हुन् ।
सानैदेखि थाइरोइडको समस्या भएकी इमानको भारतमा उपचार हुँदा तौल घटेर २५० किलो पुगेको थियो ।
एघार वर्षकी हुँदादेखि अप्राकृतिक रूपमा तौल बढेका कारण इमानलाई अनेकथरी रोगले सताएको थियो । उनको तौल नघटाउने हो भने कुनै पनि बेलामा उनको मृत्यु हुनसक्ने चेतावनी चिकित्सकहरूले दिएका थिए ।
नभन्दै यही मोटोपनका कारण उनको अल्पायुमै मृत्यु भयो ।
पच्चीस वर्षसम्म मोटोपनका कारण ओछ्यानमै बिताएकी इमानको गोडाको मांसपेशी कमजोर भएको थियो ।
उनलाई निद्राको पनि समस्या थियो । उनी जम्मा एक घन्टा सुत्थिन् ।
एजेन्सी
