२८ जेठ २०८३, बिहीबार
प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले माओवादी सशस्त्र जनयुद्ध पृथ्वीनारायण शाहको एकीकरण अभियानपछि नेपालमा जनस्तरबाट गरिएको सबैभन्दा ठूलो कीर्तिमान भएको दाबी गरेका छन् ।
मुलुकको आमूल परिवर्तनमा जनयुद्धको भूमिका अद्वितीय रहेकाले सरकारले पृथ्वी जयन्ती र जनयुद्ध दिवसमा सार्वजनिक बिदाको निर्णय एकैपटक गरेको उनले बताए ।
पूर्वउपराष्ट्रपति नन्दबहादुर पुन ‘पासाङ’को जीवनीमा आधारित पुस्तक ‘यात्रा जिन्दगी’को बिहीवार काठमाडौंमा विमोचन गर्दै प्रचण्डले जनयुद्धको जीवन्त इतिहास कुनैदिन लेखिने बताएका हुन् ।
‘पृथ्वीनारायण शाहको एकीकरण अभियानपछि नेपालमा जनस्तरबाट गरिएको सबैभन्दा ठूलो त्याग र विद्रोह जनयुद्ध नै थियो । त्यसैले गणतन्त्रपछि पहिलो पटक मैले नै पृथ्वी जयन्ती र जनयुद्ध दिवसमा सार्वजनिक विदाको घोषणा गरेँ,’ प्रचण्डले भने, ‘त्याग र बलिदानको कीर्तिमान एवं मुलुकको आमूल परिवर्तनमा जनयुद्धको भूमिका अद्वितीय छ । अहिले यसमाथि विभिन्न खालका बहसहरू पनि छन्, तर एकदिन जनयुद्धको जीवन्त इतिहास लेखिने नै छ ।’
‘जनयुद्ध दिवस’को नाममा फागुन १ गते सार्वजनिक बिदा दिने निर्णयप्रति प्रमुख प्रतिपक्षी दल नेकपा (एमाले) लगायतले विरोध गरिरहेका छन् । उनीहरूले माओवादीले शुरू गरेको हिंसात्मक आन्दोलनलाई जनयुद्ध मान्न नसकिने बताउँदै आएका छन् ।
