अहिलेका हिट अभिनेत्री, जसले बिहेपछि पनि घटाएनन् ‘फिल्मी करिअर’को रफ्तार

थुप्रै अभिनेत्रीहरू विवाहपछि फिल्म क्षेत्रबाट गुमनाम छन् । एक समयका निकै हिट अभिनेत्रीहरू विपना थापा, अरुणिमा लम्साल, सज्जा मैनालीदेखि गरिमा पन्त, सुमिना घिमिरेसम्मलाई दर्शकले फिल्ममा नदेखेको लामो समय भइसक्यो । 

उनीहरू विवाहपछि फिल्म क्षेत्रबाट पलायनजस्तै भएका हुन् । यीमध्ये धेरै अभिनेत्रीहरू विदेश पलायन भएको लामै समय भइसकेको छ । 

तर, विवाहपछि चम्किएका अभिनेत्रीहरू समेत थुप्रै छन् । करिश्मा मानन्धर निर्माता विनोद मानन्धरसँग विवाह गरेपछि चम्किएकी अभिनेत्री हुन् । उनी अहिलेसम्म पनि फिल्ममा अभिनय गरिरहेकी छिन् । उनको शीर्ष भूमिका रहेको फिल्म ‘बगान’ यही वर्ष प्रदर्शनमा आएको थियो । 

विवाहपछि चम्किएकी अर्की अभिनेत्री हुन् झरना थापा । निर्माता सुनिलकुमार थापासँग विवाह गर्दा उनको फिल्मी करिअर सुरु भएकै थिएन । 

अभिनेत्रीका रूपमा कयौँ हिट फिल्म दिएकी झरना निर्माता हुँदै सफल निर्देशकका रूपमा समेत स्थापित भइसकेकी छिन् । उनकी छोरी सुहाना थापासमेत फिल्म क्षेत्रकी चर्चित अभिनेत्री बनिसकेकी छिन् । 

झरनाको निर्देशन र सुहानाको अभिनय रहेको पछिल्लो फिल्म ‘एक भगवत र एक गीता’ यही वर्ष प्रदर्शनमा आएको थियो । 

अभिनेत्री रेखा थापा विवाहपछि फिल्म क्षेत्रमा अझ सक्रिय भएकी अभिनेत्री हुन् । निर्माता छवी ओझासँग् विवाहमा रहँदा उनी फिल्म क्षेत्रमा निकै सक्रिय थिइन् । छवीसँग सम्बन्ध विच्छेदपछि केही वर्ष सिंगल रहेकी रेखाले २०७८ सालमा बलराम शाहीसँग दोस्रो विवाह गरिन् । अहिले रेखाले फिल्म ‘उपहार’ निर्माण गरेकी छन्, जुन फिल्मको एउटा गीत शुक्रवारमात्रै युट्युबमा सार्वजनिक गरिएको छ । 

पछिल्लो समय हेर्ने हो भने, अहिलेका निकै चर्चित अभिनेत्रीहरूलाई समेत विवाहले करिअरमा कुनै असर गरेको देखिँदैन । बरु, उनीहरूको करिअर विवाहपछि अझ चम्किएको देखिन्छ । त्यस्ता अभिनेत्रीहरूले विवाह गरेपछि फिल्ममा सक्रियता घट्छ भन्ने बुझाइलाई समेत गलत सावित गरेका छन् । 

अभिनेत्री स्वस्तिमा खड्का विवाहपछि फिल्म क्षेत्रमा अझ बढी सक्रिय रहने अभिनेत्रीमा पर्छिन् । करिअरले राम्ररी पिकअप नलिँदै स्वस्तिमाले ८ वर्षअघि निर्देशक निश्चल बस्नेतसँग विवाह गरेकी थिइन् । विवाहपछि उनी फिल्म क्षेत्रमा निकै चम्किँदै गइन् । 

त्यसबेला कतिपयले उनको करिअर अब सुस्ताउँछसमेत भनेका थिए । तर, उनी विवाहपछि फिल्म क्षेत्रमा अझ सक्रिय बन्दै गइन् र केही वर्षयता फिल्ममा सबैभन्दा खोजिने अभिनेत्रीको पहिचान बनाइन् । 

एकपछि अर्को फिल्ममा काम गरिरहेकी स्वस्तिमाको ‘पशुपति प्रसाद २ः भस्मेडन’ र ‘दिमाग खराब’ प्रदर्शनरत छन् । म्युजिक भिडियो र विज्ञापनहरूमा समेत स्वस्तिमा निकै व्यस्त बन्ने गरेकी छन् । 

फिल्म क्षेत्रमा अभिनेत्री आँचल शर्माको व्यस्तता विवाहअघि र पछि उस्तै छ । चार वर्षअघि प्रेमी उदीप श्रेष्ठसँग विवाह गरेकी आँचल विवाहपछि पनि उत्तिकै सक्रिय काम गरिरहेकी छिन् । उनको पछिल्लो हिट फिल्म ‘झिंगेदाउ’ हो, जुन गतवर्ष प्रदर्शनमा आएको थियो । उनले पछिल्लो समय अभिनेता दयाहाङ राईसँग  फिल्म ‘डिग्री माइला’मा काम गरेकी छिन् । आँचल म्युजिक भिडियोमा पनि उत्तिकै व्यस्त हुने गरेकी छन् । 

अहिलेकी अर्की हिट अभिनेत्री वर्षा राउत पनि फिल्म क्षेत्रमा विवाहअघि र पछि उत्तिकै सक्रिय छिन् । ‘नाइ नभन्नू ल ४’बाट फिल्म क्षेत्रमा उदाएकी अभिनेत्री वर्षाले आजभन्दा झण्डै पाँच वर्षअघि व्यवसायीसमेत रहेका अभिनेता संजोग कोइरालासँग विवाह गरेकी थिइन् । विवाहपछि वर्षाले थुप्रै फिल्ममा अभिनय गरिसकेकी छिन् । उनले अभिनय गरेको फिल्म ‘ऐंचो पैंचो’ गत भदौंमा प्रदर्शनमा आएको थियो । वर्षा यतिबेला अर्को फिल्म ‘महाजात्रा’को सुटिङमा व्यस्त छिन् । 

विवाहपछि पनि फिल्म क्षेत्रमा उत्तिकै सक्रिय रहेकी अर्की अभिनेत्री हुन् प्रियंका कार्की । पहिलो श्रीमानसँग सम्बन्धविच्छेद गरेकी प्रियंकाले चार वर्षअघि अभिनेता आयुष्मान देशराज जोशिसँग दोस्रो विवाह गरेकी हुन् । त्यसपछि पनि प्रियंकाले थुप्रै फिल्म एवं म्युजिक भिडियोमा काम गरिसकेकी छन् । प्रियंकाको करिअरलाई पनि विवाहले कुनै असर गरेको देखिँदैन । उनले एकपछि अर्को फिल्म र म्युजिक भिडियोमा काम गरिरहेकी छन् । यतिबेला उनको अभिनय रहेको फिल्म ‘फूलबारी’ले युट्युबमा निकै राम्रो भ्युज पाइरहेको छ । 

अभिनेत्री केकी अधिकारीले विवाह गरेको धेरै भएको छैन । केकीले प्रेमी रोहित तिवारीसँग झण्डै डेढ वर्षअघि विवाह गरेकी हुन् । विवाहपछि पनि उनले एकपछि अर्को फिल्ममा काम गरिरहेकी छिन् । यतिबेला पनि केकीको अभिनय रहेको फिल्म ‘परदेशी २’ हलमा प्रदर्शनरत छ । यो फिल्म सुपरहिट भइसकेको छ । 

अभिनेत्री सुरक्षा पन्तले विवाह गरेको पनि धेरै समय भएको छैन । उनले गत फागुनमा प्रेमी अभिनेता मानव सुवेदीसँग विवाह गरेकी हुन् । सुरक्षा विवाहपछि फिल्म क्षेत्रमा विवाहअघि जस्तै गरी सक्रिय लागिरहेकी छिन् । उनको अभिनय रहेको फिल्म ‘जुलेबी’ गत भदौंमा प्रदर्शनमा आएको थियो । उनले अभिनेता दयाहाङ राईसँग फिल्म ‘कार्साङ’मा काम गर्ने तयारी छ ।

एक समयकी हिट अभिनेत्री नीशा अधिकारीले ६ वर्षअघि क्रिकेटर शरष भेष्वाकरसँग विवाह गरेकी थिइन् । विवाहपछि निशाले केही फिल्ममा अभिनय गरेकी छिन् । यद्यपि, उनको करिअर विवाहपछि केही सुस्ताएको देखिन्छ । ‘ऐश्वर्य’, ‘छक्का पञ्जा ३’जस्ता चर्चित फिल्ममा अभिनय गरेकी अभिनेत्री दिपिका प्रसाईँ पनि पछिल्लो समय फिल्ममा केही सुस्ताएकी छिन् । उनले चार वर्षअघि निर्देशक दीवाकर भट्टराईसँग विवाह गरेकी थिइन् । अहिले श्रीमान दिवाकरकै निर्देशन रहेको फिल्म ‘मायावी’मा दीपिकाले अभिनय गरेकी छिन् । जुन फिल्मको पहिलो चरणको छायांकन हालसालै सकिएको छ ।

सबै तस्वीर: अभिनेत्रीहरूका फेसबुकबाट ।