०५ साउन २०८३, मंगलबार
नेकपा एमालेका अध्यक्ष केपी शर्मा ओलीले एमालेको संगठनलाई खुलस्त स्वीकारेर आउने बाहेकका विकल्पमा वामपन्थी एकता नहुने बताएका छन् ।
बुधवार पार्टीको केन्द्रीय कमिटी बैठकलाई सम्बोधन गर्दै ओलीले आफूहरूलाई नीतिलाई खुलस्त मानेर कोही आए एकता गर्ने नभए एकताको गीत नगाउन पार्टी पंक्तिलाई निर्देशन दिएका हुन् ।
‘पार्टी एकता त्यस्तो बेलामा हुन्छ जब अर्कोले आवश्यकता ठान्छ । हाम्रा नीतिलाई मानेपछि, संगठनको सुप्रिमेसीलाई खुलस्त स्वीकारेपछि मात्रै एकता हुन्छ । नत्र बराबर दुई अध्यक्ष राखेर एकता हुँदैन’, ओलीले भने, ‘हामीले अनुभव, कोशिश, प्रयोग र व्यवहारले उन्नत रुप देखायौं । हामीले आफ्नो शक्ति निर्माण गर्ने हो । वैशाखी खोज्ने होइन । आफ्ना खुट्टा बलियो बनाउने हो यतातिर लाग्नुपर्छ ।’
ओलीले वामपन्थी शक्ति नमिली हुँदैन भन्ने पपुलिस्ट कुरा नगर्न पनि पार्टी पंक्तिलाई चेतावनी दिएका छन् ।
‘प्रगतिशील र दक्षिणपन्थी दुई धार छन् । तर वामपन्थी शक्ति नमिलीकन हुँदैन भन्ने पपुलिस्ट कुरा नगर्नुस् । वामपन्थी मिल्नुपर्छ भन्ने कुन नयाँ कुरा हो ? वापमन्थी एकता भन्ने कुरा मैंले राजनीति शुरू गर्दा देखि सुनेको हो । वामपन्थीबीच जति एकता गरायो त्यत्ति फुटे । एउटा एकता दुई फुट यो निरन्तर हुँदै आएको छ’, ओलीले भने ।
‘हामीले त्यतिखेर आवश्यकता भएर एकता गर्यौं । किनकि काम देखाउनुपर्ने थियो । सरकार बनाउनुपर्ने थियो । हामी सरकारमा नगएको भए केही सक्दैन थियौं । यसकारण काँचो राजनीति चपाएर बसेर केही हुँदैन', उनले थपे, 'राजनीतिक उद्देश्य र सिद्धान्तलाई नछोडी, आफ्ना विचारमा सहमत गर्न नसक्ने, अरूका विचारमा लहस्सिँदै जानु वामपन्थी होइनन् । यसैले एकताको रट नलगाउनुस् पार्टी निर्माणमा लाग्नुस् ।’
