२३ असार २०८३, मंगलबार
प्रधानमन्त्री पुष्पकमल दाहाल ‘प्रचण्ड’ पार्टीको महोत्तरीको बर्दिबास आइपुगेका छन् । नेकपा (माओवादी केन्द्र)का अध्यक्षसमेत रहेका प्रचण्ड पार्टीको आन्तरिक बैठक र प्रशिक्षण कार्यक्रममा सहभागी हुन आज बिहान बर्दिबास पुगेका हुन् ।
बर्दिबास–४ माइस्थानमा दलको तीन महिने रूपान्तरण अभियानको मधेश प्रदेश समीक्षा बैठकमा सहभागी हुन प्रचण्ड यहाँ आएको माओवादी केन्द्रका मधेस प्रदेश इञ्चार्ज लिलामणि पोखरेलले बताए ।
उनले बैठकमा मधेश प्रदेशबाट पार्टी केन्द्रीय समितिमा प्रतिनिधित्व गर्ने सदस्य, जिल्ला इञ्चार्ज र रूपान्तरण अभियानका जिल्ला संयोजकबीच अभियानारे समीक्षा भइरहेको जानकारी दिए ।
प्रदेशका आठवटै जिल्लामा सञ्चालित अभियानको जिल्ला इञ्चार्जबाट जानकारी लिएपछि अध्यक्ष दाहालले थप निर्देशन दिने छन् ।
उनी आजै दिउँसो जिल्लाको गौशाला–५ स्थित बहुद्देश्यीय भवनमा सञ्चालन हुने पार्टीको प्रदेशस्तरीय प्रशिक्षण कार्यक्रममा सहभागी हुनेछन् ।
प्रशिक्षणमा प्रदेशबाट प्रतिनिधित्व गर्ने केन्द्रीय सदस्य, प्रदेश समिति पदाधिकारी तथा सदस्य, अभियानका जिल्ला संयोजक र सम्बद्ध सदस्यहरू, जिल्ला अध्यक्षसहित एक हजार आठ सय नेता सहभागी हुनेछन् । प्रधानमन्त्री दाहाल आजै काठमाडौँ फर्किने छन् ।
