०४ साउन २०८३, सोमबार
सशस्त्र प्रहरी बलका प्रहरी सहायक निरीक्षक (असई) थमन विक हत्या प्रकरणमा नेकपा (एमाले)का सांसद लक्ष्मी महतो कोइरीलाई महोत्तरी जिल्ला अदालतले सफाइ दिएको छ ।
न्यायाधीश उद्धवप्रसाद भट्टराईको इजलासले बिहीवार सफाइ दिने फैसला गरको हो ।
सोही प्रकरणमा प्रतिवादी पवन कापरलाई पनि सफाइ दिइएको अदालतका सूचना अधिकारी महेन्द्र झाले लोकान्तरलाई जानकारी दिए ।
महोत्तरी क्षेत्र नम्बर १ बाट निर्वाचित सांसद कोइरी २०८० वैशाख १९ गतेदेखि निलम्बित छन् ।
२०७२ मा संविधान जारी गर्नुअघि संविधानको अन्तिम मस्यौदा सार्वजनिक भएपछि त्यसमा असन्तुष्टि जनाउँदै मधेश आन्दोलित भएको थियो ।
आन्दोलनकै क्रममा २०७२ भदौ २५ गते महोत्तरीको जलेश्वरमा सशस्त्र असई थमन विकको हत्या अभियोगमा कोइरी प्रतिवादी थिए ।
आन्दोलनमा घाइते भएका विकलाई आन्दोलनकारीले एम्बुलेन्सबाट थुतेर हत्या गरेका थिए । सोही मुद्दामा उच्च अदालत जनकपुरले कोइरीलाई पूर्पक्षका लागि थुनामा राख्न आदेश दिएको थियो ।
जिल्ला अदालत महोत्तरीका श्रेस्तेदार मदनप्रसाद जयसवालका अनुसार २०७६ असोज २ गते थुनछेक बहसका क्रममा जिल्ला अदालतले भने १ लाख धरौटीमा छाड्न आदेश दिएको थियो ।
