१९ असार २०८३, शुक्रबार
भारतमा चोरी भएका गाडी नेपालमा ल्याएर सस्तोमा बिक्री गर्ने गरेको पाइएको छ । नेपाली बजारमा करिब ७५ लाख रुपैयाँ पर्ने चोरीका कार २१ लाख रुपैयाँमा बिक्री गर्ने दुई जना पक्राउ परेका छन् ।
काठमाडौं उपत्यका अपराध अनुसन्धान कार्यालयले उनीहरूलाई क्रेटा, ब्रेजा र इलेक्टोनिक्स ५ वटा गाडीसहित पक्राउ गरेको छ ।
अपराध अनुसन्धान कार्यालयका प्रवक्ता प्रहरी उपरीक्षक (एसपी) मिलन केसीका अनुसार काठमाडौंका विभिन्न ठाउँबाट प्रहरीले नक्कली ब्लुबूकसहित उनीहरूलाई पक्राउ गरेको हो ।
पक्राउ पर्नेमा डीबी तामाङ भन्ने दिलबहादुर तामाङ र सिन्धुपाल्चोक साँघाचोक नगरपालिका १ चौताराका आइतसिंह तामाङ छन् । पक्राउ परेका दिलबहादुरसँग २ वटा नागरिकता समेत बरामद भएको प्रहरीले जनाएको छ ।
उनले काभ्रेको तेमाल गाउँपालिका ८ बाट दिलबहादुर तामाङ र सिन्धुली जिल्ला प्रशासन कार्यालयबाट डीबी तामाङको नामबाट नागरिकता लिएको एसपी केसीले लोकान्तरलाई बताए ।
प्रहरीले दिलबहादुरलाई काठमाडौं महानरपालिका १३ कालिमाटीबाट पक्राउ गरेको थियो ।
उनको साथबाट प्रहरीले एनएमबि बैंकको सातौं तहको अधिकृतको छाप र यातायात व्यवस्था विभागको छापलगायत अन्य सरकारी छापहरू बरामद गरेको छ ।
एसपी केसीका अनुसार उनीहरूले भारतबाट गाडीहरू चोरी गरेर नेपाल ल्याउने र त्यसलाई नक्कली ब्लुबूक बनाएर बिक्री गर्ने गरेका थिए । ‘उनीहरूले भारतबाट ल्याएर नक्कली ब्लुबूक बनाउँदा रहेछन् । त्यो ब्लुबुक ट्राफिक प्रहरीलाई समेत थाहा पाउन कठिन हुँदोरहेछ,’ एसपी केसीले लोकान्तरसँग भने ।
अनुसन्धानमा खटिएका अधिकारीहरूका अनुसार दिलबहादुरले एउटा फुल अप्सनको क्रेटा गाडीलाई नेपालमा २१ लाखसम्म बिक्री गर्ने गरेको पाइएको छ ।
क्रेटा कार नेपाली बजारमा करिब ७५ लाख रुपैयाँ पर्छ । ‘नेपालमा क्रेटा फुल अप्सनको गाडी लगभग ७५ लाख रुपैयाँ पर्छ, उनीहरूले २१ लाखमा बेच्दा रहेछन्,’ ती अधिकारीले लोकान्तरसँग भने ।
प्रहरीले नक्कली ब्लुबूक बनाएर गाडी बिक्री गर्ने अन्य २ जनालाई नेपालगञ्जबाट पक्राउ गरेको छ । उनीहरूलाई पनि काठमाडौं ल्याइने प्रहरीले जनाएको छ ।
