२३ जेठ २०८३, शनिबार
रुकुम पश्चिममा ट्र्याक्टर दुर्घटना हुँदा एकै गाउँका पाँच जनाको मृत्यु भएको छ । जिल्लाको आठबीसकोट नगरपालिका-१० मा गएराति रा १ त १४ नम्बरको ट्र्याक्टर दुर्घटना भएको जिल्ला प्रहरी कार्यालयका प्रहरी निरीक्षक धर्मेन्द्र खड्काले लोकान्तरलाई जानकारी दिए ।
उनका अनुसार दुर्घटनामा ज्यान गुमाउने सबै आठबिसकोट नगरपालिका वडा नम्बर १० का हुन् । दुर्घटनामा वर्ष ४६ का लोकबहादुर शाही र उनकी श्रीमती वर्ष ४२ की चुकी शाहीको ज्यान गएको छ । यस्तै, ५२ वर्षका भर्दर सार्की, ४८ वर्षका धनराम सार्की र ४७ वर्षकी निर्मला सार्कीको पनि दुर्घटनामै ज्यान गएको छ ।
आठबिसकोटबाट भूकम्प पीडितहरूको अस्थाई घरटहरा निर्माणको लागि जस्तापाता लिएर घर्तीगाऊतर्फ जाँदै ट्र्याक्टर दुर्घटना भएको प्रहरीले जनाएको छ ।
दुर्घटनामा नौ जना घाइते भएका छन् । घाइते हुनेमा आठबीसकोट–८ का ४१ वर्षीय खड्कबहादुर पुन, आठबीसकोट–१० का ३८ वर्षीय रमेश सार्की, आठबीसकोट–८ का १४ बर्षीय दलबहादुर पुन, ५६ वर्षीय कुमारघर्ती रहेका छन् ।
यस्तै, ३४ वर्षीया रमा गुरुङ, ५१ वर्षीय जगवीर सार्की, ३६ वर्षीय जयबहादुर घर्ती, ५८ वर्षीय मने सार्की, ४२ वर्षीय मदन पुन घाइते छन् ।
घाइतेहरूलाई उपचारको लागि नगर अस्पताल आठबिसकोटतर्फ पठाइएको खड्काले बताए । ट्र्याक्टर चालकलाई प्रहरीले नियन्त्रणमा लिएको छ ।
