युरोपेली सुपर लिगका प्रवर्द्धकहरूले नयाँ ६४ टोली पुरुष फूटबल प्रतियोगिताको आयोजना गर्ने घोषणा गरेका छन् । युरोपेली फूटबल महासंघ (यूईएफए)ले प्रतिद्वन्द्वी प्रतियोगिता अवरुद्ध गर्न युरोपेली युनियन (ईयू)को कानून उल्लङ्घन गरेको युरोपेली अदालतले फैसला गरेपछि अलग भएका उनीहरू बिहीवार यस्तो घोषणा गरेका हुन् । 

ए२२ स्पोर्ट्स म्यानेनजमेन्टले योजनाबद्ध रुपमा प्रतियोगिता कहिलेदेखि शुरू हुन्छ भन्ने विवरण सार्वजनिक भएको छैन । प्रतियोगितामा पदोन्नति (प्रमोसन) र घटुवा (रेलिगेसन)को सुविधा हुने र युनिफाई नामक ‘नयाँ स्ट्रिमिङ प्लेटफर्मममा’ प्रतियोगिताको निःशुल्क प्रत्यक्ष प्रसारण गरिने जनाइएको छ ।

सन् २०२१ अप्रिल सुपर लिगको अवधारणा आएको थियो । तर यसले शुरुवातीमै असफलता भोग्यो । फेरि सुपर लिगलाई प्रवर्द्धन गर्न सन् २०२२ को अन्त्यमा ए२२ स्पोर्ट्स म्यानेजमेन्टको स्थापना गरिएको थियो ।

अदालतको फैसलाप्रति प्रतिक्रिया दिँदै ए २२ का प्रमुख कार्यकारी अधिकारी बर्नाड रिचर्टले भिडियोमार्फत फूटबल स्वतन्त्र र यूईएफएको एकाधिकारबाट मुक्त भएको बताएका छन् । 

‘फूटबल स्वतन्त्र हो, यूईएफएको एकाधिकारबाट मुक्त, प्रतिबन्धहरूको डरबिना सर्वोत्तम विचारहरूलाई अगाडि बढाउनका लागि स्वतन्त्र छ,’ उनले भने । 

यसअघि यूईएफएले प्रारम्भिक परियोजना रोक्नका लागि अवैध रणनीति प्रयोग गरेको थियो । उक्त परियोजनामा १२ वटा मात्र क्लब थिए । बिहीवार घोषणा गरिएको नयाँ योजनामा ६४ टोलीलाई तीन भिन्नाभिन्नै लिगमा विभाजन गरिनेछ । शीर्ष स्टार लिगमा १६ क्लबलाई आठ क्लबका हिसाबले दुई समूहमा विभाजन गरिनेछ ।

गोल्ड लिग नाम रहेको दोस्रो स्तरमा पनि १६ क्लब सहभागी हुनेछन् । यसमा पनि आठ÷आठ क्लबको दुई समूह हुनेछन् । ब्लु लिग नामको तेस्रो स्तरमा प्रत्येक समूहमा आठ क्लब रहने गरी ३२ क्लब सामेल हुनेछन् ।