०८ साउन २०८३, शुक्रबार
भौतिक पूर्वाधार तथा यातायात मन्त्री प्रकाश ज्वालाको गाडीमा आगजनी भएपछि ललितपुरको बालकुमारी सडकखण्ड अवरुद्ध बनेको छ ।
पार्टी कार्यालयबाट मन्त्रालय जाने क्रममा बन्त्रीको गाडीमा रोजगारी अनुमति प्रणाली (इपीएस) परीक्षाको विषयलाई लिएर प्रदर्शनमा उत्रिएका युवाहरूले आगजनी गरेपछि सो सडक खण्ड अवरुद्ध बनेको हो ।
काठमाडौं उपत्यका ट्राफिक प्रहरी कार्यालयका अनुसार मन्त्रीको गाडीमा आगजनी भएपछि सडक खण्ड अवरुद्ध छ ।
आन्दोलनका कारण ग्वार्कोबाट कोटेश्वर आउने र कोटेश्वरबाट ग्वार्को जाने सवारी साधनलाई डाइभर्सन गरिएको प्रहरीले जनाएको छ ।
त्यस्तै, ग्वार्कोबाट इमाडोल र मंगलबजार आउने जाने सवारी साधनलाई पनि डाइभर्सन गरिएको छ ।
यसबाहेक उपत्यकाका अन्य मुख्य चोकहरूमा सवारी साधन ट्राफिक व्यवस्थापनका क्रममा केही समय रोकिनु पर्ने अवस्था रहेको प्रहरीले जनाएको छ ।
अश्रुग्यास प्रहार गरेर प्रहरीले स्थिति नियन्त्रणमा लिने प्रयास गरिरहेको छ । प्रहरीले आन्दोलनकारीलाई लखेट्दै ग्वार्कोबाट ललितपुरको एकान्तकुना पुर्याएको छ ।
आन्दोलनकारीहरू सडकमा रहेका डिभाइडर भत्काउँदै ढुंगा फ्याँक्दै भागिरहेका छन् ।
परीक्षाको विषयलाई लिएर आन्दोलनरत उनीहरूले शुक्रवार मध्यान्ह ललितपुरको बालकुमारी क्षेत्रमा मन्त्री ज्वालाको बा २ झ ५८६१ नम्बरको गाडीमा आगजनी गरेका थिए ।
