०७ साउन २०८३, बिहीबार
दक्षिण अफ्रिकामा जारी यू–१९ क्रिकेट विश्वकप प्रतियोगितामा नेपाललाई सुपर सिक्समा प्रवेश गराउन महत्वपूर्ण योगदान दिएका कप्तान देव खनाललाई तिलोत्तमा नगरपालिकाले नगदसहित सम्मान गर्ने भएको छ ।
शुक्रवार भएको अफगानिस्तानविरुद्धको खेलमा १ विकेटको जीत निकाल्दै नेपाललाई सुपर सिक्स प्रवेश गराउन सफल भएको भन्दै कप्तान खनाललाई नगरपालिकाले नगद ५० हजार रुपैयाँ दिने घोषणा गरेको नगर प्रमुख रामकृृष्ण खाणले बताए ।
‘विश्वकप क्रिकेटमा नेपाली टोलीका कप्तान खनालले नेपालको प्रतिष्ठा माथि उठाउन र टोलीलाई विजयी गराउन महत्वपूर्ण भूमिका निर्वाह गर्नुभएको छ,’ उनले भने, ‘यसर्थ नगरपालिकाले उहाँलाई सम्मान गर्ने निर्णय गरेको हो ।’
कप्तान खनालले अफगानिस्तान विरुद्ध अर्धशतकीय पारीसहित ५८ रनको योगदान दिएका थिए । रुपन्देहीको तिलोत्तमा नगरपालिका– १३ का स्थायी बासिन्दा रहेका कप्तान खनालले देशको सँगै सिंगो नगरकोसमेत प्रतिष्ठा बढाएको नगर प्रमुख खाणले बताए । नगरपालिकाले यसअघि पनि ३ जना खेलाडीलाई जनही ५० हजार रुपैयाँ दिएर सम्मान गरेको थियो ।
