०९ साउन २०८३, शनिबार
विदेशमा काम गर्ने नेपालीले पठाउने रकम विप्रेषण (रेमिट्यान्स) गत वर्षभन्दा यस वर्ष बढेको छ ।
नेपाल राष्ट्र बैंकले मंगलवार जारी गरेको देशको वर्तमान आर्थिक र वित्तीय स्थितिको प्रतिवेदनअनुसार देशको विप्रेषण आप्रवाह नेपाली रुपैयाँमा २५.३ प्रतिशतले र अमेरिकी डलरमा २२.६ प्रतिशतले बढेको हो ।
पछिल्लो समय विदेशीने नेपालीहरूको संख्या बढिरहँदा रेमिट्यान्स पनि बढेको छ ।
यस्तै अपेक्षाअनुसार राजस्व संकलन हुन नसक्दा सरकारी खाता घाटामा गएको पनि प्रतिवेदनमा उल्लेख छ ।
सरकारी खाता ७० अर्बले घाटामा गएको देखाएको हो ।
आव २०८०-८१ को ६ महिनाको तथ्यांकले सरकारी खाता घाटामा गएको देखाएको हो ।
२०८० पुससम्ममा नेपाल सरकारको खर्च ५ खर्ब ६६ अर्ब ६२ करोड देखिएको छ भने राजस्व परिचालन जम्मा ४ खर्ब ९६ अर्ब ५० करोड छ ।
सोधनान्तर स्थिति २ सय ७३ अर्ब ५२ करोडले बचतमा रहेको राष्ट्र बैंकले जनाएको छ ।
विदेशी विनिमय सञ्चिति १८१६ अर्ब ५७ करोड र अमेरिकी डलरमा १३ अर्ब ६९ करोड रहेको राष्ट्र बैंकको तथ्यांकले देखाएको छ ।
