आड्रा नेपालद्वारा मधेश प्रदेशका विभिन्न जिल्लामा सञ्चालित स्वास्थ्य तथा जीविकोपार्जन कार्यक्रम आड्राको क्षेत्रीय कार्यालय एसियाका निर्देशकसहितको टोलीले अवलोकन तथा निरीक्षण गरेको छ ।

महोत्तरीको एकडारा गाउँपालिकासँगको समन्वयमा आड्रा नेपाल र बागमती सेवा समाज नेपालद्वारा सञ्चालित दुई दिने वृहत् प्रजनन स्वास्थ्य शिविरको अनुगमन गरेको आड्राको अन्तर्राष्ट्रिय टोलीले गरेको हो ।
 
विशेषज्ञ सेवासहितको उक्त शिविरमा सम्पूर्ण सेवाहरू नि:शुल्क प्रदान गरिएको थियो । माघ २४ र २५ गते चलेको २ दिने शिविरमा ४२४ जनाले सेवा लिएको आड्रा नेपालले जनाएको छ ।

शिविरमा स्त्रीरोग, गर्भवती तथा सुत्केरी महिलाको जाँच, परिवार नियोजन र मनोपरामर्श आदि सेवा उपलब्ध गराइएको थियो ।

बागमती सेवा समाजका कार्यबाहक कार्यकारी निर्देशक सुनिलकुमार साहले मधेश प्रदेशभरि आवश्यकताका आधारमा पालिकहरूसँग समन्वय गरी यस्ता शिविर सञ्चालन गरिने बताए ।

यसैगरी परियोजना अनुगमनका लागि मधेश प्रदेश दौडाहामा रहेको उक्त टोली महोत्तरीको औरही नगरपालिका अन्तर्गतका विपन्न तथा मुसहर समुदायका गर्भवती र सुत्केरी महिलालाई पोषण परामर्श एवं सामग्री वितरणमा पनि उक्त टोली सरिक भएको थियो । त्यसक्रममा १४६ जना महिलालाई पोषण परामर्श तथा सामग्री वितरण गरिएको थियो ।

आड्रा नेपालका कार्यक्रम निर्देशक डा. घनश्याम भट्टले मधेश प्रदेशका सम्पूर्ण पालिकामा क्रमिकरूपमा पोषण कर्नर स्थापना गर्ने र समुदायस्तरसम्म स्थानीय तहमा पाइने विभिन्न अन्नका पोषणयुक्त परिकार बनाउन सिकाइ मातृ तथा शिशुको स्वास्थ्य सुदृढ गर्ने लक्ष्य लिइएको बताए ।