१० साउन २०८३, आइतबार
कोशी प्रदेशका मुख्यमन्त्री केदार कार्कीले तेस्रोपटक मन्त्रिपरिषद् विस्तार गरेसँगै प्रदेश सरकारप्रति असुन्तुष्टिका चाङहरू देखा पर्न थालेका छन् । नेपाली कांग्रेसबाट मुख्यमन्त्री बनेका कार्कीले शुक्रवार ४ मन्त्री र २ राज्यमन्त्री नियुक्त गरेका थिए । तर शपथ ग्रहण सकिएलगतै उनकै दल कांग्रेस र सत्ता गठबन्धनकै दल नेकपा (एकीकतृ समाजवादी)ले नै विरोध जनाएका छन् ।
कांग्रेसको इतर पक्षका नेता डा शेखर कोइरालानिकट मानिने मुख्यमन्त्री कार्कीले शुक्रवार गरेको मन्त्रिपरिषद् विस्तारप्रति पार्टीकै संस्थापन पक्ष असन्तुष्ट बनेको हो । संसदीय दलका नेतासमेत रहेका उद्धव थापासहित कांग्रेसका सांसदहरूले शपथ ग्रहण नै बहिस्कार गरेका थिए । कार्की कांग्रेसबाट विद्रोह गरेर नेकपा (एमाले)को सहयोगमा मुख्यमन्त्री बन्दा साथ दिएका सांसदसमेत शपथमा अनुपस्थित रहे । मन्त्री हुने बाहेकका कोही पनि कांग्रेसका सांसद शथपमा नगएका हुन् ।
मुख्यमन्त्री कार्कीले आफूसँगै दलहरूसँग पनि सल्लाह नगरी मन्त्रिपरिषद् विस्तार गरेपछि शपथमा जानु उचित नलागेको कांग्रेस संसदीय दलका नेता थापाले प्रतिक्रिया दिएका छन् ।
यसले कोशी प्रदेशको राजनीति नै अस्तव्यस्त बनेको उनको भनाइ छ । कोशीमा अब गठबन्धनले पनि थेग्न नसक्ने अवस्था बनेको उनले बताए । ‘अस्ति राष्ट्रियसभा चुनावले पनि त्यो देखाएको हो,’ लोकान्तरसँगको कुराकानीमा थापाले भने ‘गठबन्धन पनि रहेन । सांसद आफ्नो मर्यादामा रहेनन् । स्थानीय तहका पनि इमान्दार भएनन् । त्यसले गर्दा यो गठबन्धनको कुरै अन्योलमा छ ।’
मुख्यमन्त्री कार्कीले यसै रवैया कायम राखे अब गठबन्धन दलले सहयोग र समर्थन गरेर जाने अवस्था नभएको उनले स्पष्ट पारे ।
कोशी सरकारले केहीदिनअघि ल्याएको अध्यादेश पनि अन्धाधुन्ध भएको उनले बताए ।
‘मन्त्रिपरिषद् विस्तार गर्दा दलमा सल्लाह हुँदैन । सरकारले के गर्दैछ दललाई जानकारी छैन । गठबन्धनलाई जानकारी हुँदैन । त्यस्तो हिसाबले त गठबन्धनले र दलले सरकारलाई हेर्ने दृष्टिकोणमा फरक रहने अवस्था बन्यो,’ उनले भने ।
संविधानको धारा १६८ को उपधारा (५) अनुसारको सरकार दलले बनाएकै होइन स्वतन्त्र हैसियतमा कार्कीको मुख्यमन्त्रीमा नियुक्ति भएको हो । अनि किन दललाई सोध्नु पर्याे त ? भन्ने प्रश्नमा पूर्वमुख्यमन्त्रीसमेत रहेका थापाले भविश्यमा पनि यस्तै परिपाटी बस्न सक्नेमा चिन्ता व्यक्त गरे ।
मुख्यमन्त्री भएपछि कार्कीले दल र गठबन्धनलाई सम्हालेर लान नसकेको उनको आरोप रहेको छ । ‘कसैसँग सल्लाह नगरी एकदमै बायुपंखी घोडाजस्तो दौडेको छ, दौडेको छ । भनेको पनि मान्नेवाला छैन,’ उनले भने, ‘मैँ हुँ हिसाबले काम गरेको देखियो ।’
यसले मुख्यमन्त्री कार्कीलाई धेरै दिनसम्म सफल बनाउन नसक्ने उनले दाबी गरे ।
सत्ता गठबन्धन कै एकीकृत समाजवादीका संसदीय दलका नेता राजेन्द्र राईले पनि मुख्यमन्त्री राईले गरेको सरकार विस्तारप्रति असन्तुष्टि व्यक्त गरेका छन् ।
