२१ जेठ २०८३, बिहीबार
सत्तारुढ नेकपा (माओवादी केन्द्र)को केन्द्रीय समितिको पाँचौ पूर्ण बैठक जारी छ । बैठक आइतवार मध्यान्ह काठमाडौंकाे राष्ट्रिय सभागृहमा शुरू भएको हो ।
बैठकमा पार्टीको समग्र अवस्थाका बारेमा छलफल हुने पार्टीका उपाध्यक्ष एवम् प्रवक्ता अग्निप्रसाद सापकोटाले जानकारी दिए ।
उनका अनुसार बैठक आइतवार र सोमवार दुई दिनसम्म चल्नेछ । बैठकमा माओवादी केन्द्रले यसअघि सञ्चालन गरेको चार महिने ‘जनतासँग माओवादी विशेष अभियान’मा विशेष समीक्षा गर्ने कार्यसूची छ ।
बैठकमा समसामयिक राजनीतिक विषयका अलावा पार्टीको काम कारबाही र आगामी फागुन १ गतेदेखि तय गरिएको विधान सम्मेलनबारे पनि छलफल हुनेछ ।
माओवादी केन्द्रले चार महिने अभियानमा पार्टीको सङ्गठन निर्माण, पुनःनिर्माणका अलावा शहीद परिवार, बेपत्ता योद्धाका परिवार, घाइते अपाङ्गता भएका कार्यकर्तासँग भेटघाट गरेको थियो ।
सरकारमा रहेर गरिएको सुशासन र समृद्धिको अभियानबारे जनतालाई जानकारी गराएको थियो । गत भदौ १६ गतेदेखि शुरू भएको सो अभियान गत पुस १७ गतेसम्म चलेको थियो ।
