नेकपा माओवादी केन्द्रको विधान अधिवेशनमा पार्टीको चुनाव चिन्ह फेर्न सुझाव आएका छन् ।

विधान अधिवेशनमा बनाइएका २० समूहमध्येबाटै टोली नेताले रिपोर्टिङ गर्ने क्रममा पार्टीको गोलाकारभित्रको हँसिया हथौडा फेर्नुपर्ने सुझाव आएको एक प्रतिनिधिले जानकारी दिए । 

‘बुधवार दिउँसोबाट छलफल सकेका २० मध्येका समूहका नेताले संयुक्त बैठकमा सुझाव दिने क्रम शुरू भएको छ । यस क्रममा बुधवार ४ बजेसम्ममा समूह १५, २० र ७ का नेताले समूहको छलफलपछि हललाई रिपोर्टिङ गर्नुभएको छ’ ती प्रतिनिधिले लोकान्तरसँग भने, 'चुनाव चिन्ह भद्दा भयो । मतदान गर्न जनतालाई बुझाउन गाह्रो भयो । यसैले चुनाव चिन्ह फेरौं भन्ने प्रस्ताव पनि आएका छन् ।’​​

शहरी मतदातालाई प्रभाव पार्न गाह्रो भएको भन्दै पार्टीको नाम पनि नेकपा समाजवादी या यस्तै हुने गरी राख्नुपर्ने सुझाव आएको ती प्रतिनिधिले जानकारी दिए ।

२० वटै समूहका टोली नेतालाई समूहको सुझाव पेश गर्न १०/१० मिनेटको समय दिइएको छ । 

यी सबै रिपोर्टिङ सकिएपछि अध्यक्ष पुष्पकमल दाहाल 'प्रचण्ड'ले जवाफ दिएपछि बिहीवार साँझसम्ममा विधान अधिवेशन सकाउने तयारी माओवादीको छ । 

अधिवेशनमा केन्द्रीय कमिटी छरितो हुने गरी बढीमा १५१ सदस्यीय बनाउन, बहुपदमा जाने भए स्थायी कमिटी राख्न नहुने सुझाव आएको जानकारी अर्का प्रतिनिधि हरि दाहालले लोकान्तरलाई दिए ।