लिखित प्रश्नविपरीत हिन्दु धर्मसम्बन्धी विषय संसद्मा सोधिएपछि प्रधानमन्त्री पुष्पकमल दाहाल प्रचण्डले संसद्मा असन्तुष्टि जनाएका छन् । आइतवार प्रधानमन्त्रीसँगको प्रश्नोत्तर कार्यक्रममा नेकपा (एमाले)का सांसद किरण साहले हिन्दू अल्पसंख्यक रहेको ठाउँमा अतिवादीले आक्रमण गरिरहेको भन्दै प्रश्न सोधेका थिए । 

‘देशभित्र हिन्दू अल्पसंख्यक रहेको ठाउँमा चाडबाडको समयमा अतिवादीद्वारा हिंसांत्मक आक्रमण भइरहेको छ । धर्म निरपेक्षता हिन्दूको समुल विनासको लागि ल्याइएको हो ? हिजैदेखि मेरो क्षेत्र रौतहटमा कफ्र्र्यू लागू भइरहेको छ,’ सांसद साहले प्रश्न गरे । 

लिखित प्रश्नभन्दा बाहिर सोधेको भन्दै यसप्रति प्रधानमन्त्री प्रचण्डले असन्तुष्टि जनाए । ‘माननीयले यही आएर प्रश्नमा प्रश्न थप्दा, हाम्रो विधि प्रक्रिया कार्यक्रमको अवस्था के हुन्छ ? मेरो चिन्ता त्यसतर्फ छ’ प्रचण्डले भने, ‘हिन्दूराष्ट्रबारे जे कुरा राख्नु भएको छ, मेरो ध्यानाकर्षण भएको छ । त्यसलाई गम्भीर रुपमा लिइन्छ ।’ 

रौतहटबाट स्वतन्त्र चुनाव जितेका साह पछि एमालेमा गएका थिए । उनले प्रतिनिधिसभामा संस्कृत भाषामा शपथ लिएका थिए ।