फागुन २९ गते हुने राष्ट्रिय सभा अध्यक्षको निर्वाचनबारे छलफल गर्न नेकपा माओवादी केन्द्रको स्थायी कमिटीको बैठक जारी रहेको छ । बैठकमा कार्यविभाजनसहित राष्ट्रिय सभा अध्यक्षमा दाबेदारी दिनेबारे पनि महत्वपूर्ण निर्णय हुने माओवादीले जनाएको छ । 

मंगलबारको बैठकमा बोल्ने अधिकांश सदस्यले राष्ट्रिय सभाको अध्यक्ष कांग्रेसलाई दिन नहुने मत राखेका थिए । यतिमात्रै होइन कांग्रेस महासमिति बैठकमा भएको गठबन्धन विराधी छलफलको विषयमा पनि माओवादीले गम्भीर ध्यानाकर्षण भएको जनाएको छ ।

कोशीमा कांग्रेसका कृष्णप्रसाद सिटौलाले जित्ने तर ,राष्ट्रिय सभा सदस्यको निर्वाचनमा आफ्ना उम्मेदवार चम्पादेवी कार्की पराजित भएपछि माओवादीले अध्यक्ष आफैंसँग राख्ने तयारी गरेको छ । राष्ट्रिय सभामा सबैभन्दा ठूलो दल भएकोले पनि अध्यक्ष कांग्रेसलाई दिन नहुने मत माओवादीभित्र छ । 

कांग्रेसले पनि नेता कृष्णप्रसाद सिटौलालाई उम्मेदवार बनाउने बताउँदै आएको छ । माओवादी प्रवक्ता अग्निप्रसाद सापकोटाले पनि कांग्रेसको महासमितिमा गठबन्धन विरोधी मत प्रकट भएपछि स्थायी समितिमा राष्ट्रिय सभा अध्यक्ष आफैंसँग राख्नुपर्ने मत बलियो भएको बताए । यसबारे बुधबारको बैठकले निर्णय लिने उनको भनाइ छ ।