सहकारी ठगीमा जोडिएका रवि लामिछानेलाई गृहमन्त्रीको जिम्मेवारी दिइएकोबारे संसद्‌मा प्रधानमन्त्री पुष्पकमल दाहाल 'प्रचण्ड'को जवाफ माग्दै नेपाली कांग्रेसले प्रतिनिधि सभा बैठक अवरोध गरेको छ ।

कांग्रेसको अवरोधपछि शुक्रवार सवा २ बजे स्थगित बैठक अपरान्ह ४ बज्न लाग्दा पनि  शुरू हुन सकेको छैन । 

बैठक सुचारु गर्न सभामुख देवराज घिमिरेको कार्यकक्षमा प्रमुख सचेतकहरूको छलफल भए पनि सहमति जुट्न सकेको छैन ।

सहकारी ठगीको आरोप लागेका गृहमन्त्री लामिछानेलाई प्रस्ताव पेश गर्न नदिने नेपाली कांग्रेसको अडानपछि प्रतिनिधि सभा बैठक १५ मिनेटका लागि स्थगित गरिएको थियो ।

बैठकमा गृहमन्त्री लामिछाने राजनीतिक दलसम्बन्धी दोस्रो संशोधन विधेयक माथि विचार गरियोस् भन्ने प्रस्ताव पेश गर्ने कार्यसूची थियो ।