२६ जेठ २०८३, मंगलबार
नेकपा (माओवादी केन्द्र)का केन्द्रीय सदस्य रामकुमार शर्माले पार्टी परित्याग गरेका छन् । आफू पार्टीमा संलग्न हुँदा देखेको सपना र अहिले प्रमुख नेतृत्व र सरकारबाट भैरहेको कामको समीक्षा गर्दा आकाश पातालको फरक पाएको भन्दै उनले पार्टी परित्यागको घोषणा गरेका हुन् ।
जनयुद्धको दौरान आफैंले उठाएको मुद्दाबाट च्युत हुँदै जनादेशविपरीत पटक-पटक गठबन्धन फेरिरहने र देशलाई अस्थिरताको अध्यारो दिशातर्फ धकेलेको महसुस गरेको भन्दै माओवादीमा बसिरहन नैतिकताले नदिएको उनले बताएका छन् ।
'माओवादी पार्टीमा संलग्न हुँदा मैले देखेको सपना र अहिले माओवादी पार्टीका प्रमुख नेतृत्व र सरकारबाट भैरहेको कामको समीक्षा गर्दा आकाश पातालको फरक पाएको अनुभूति हुन्छ । महान जनयुद्धको समय आदर्श मानिएका प्रमुख पदाधिकारीहरू नै विभिन्न भ्रष्टाचार काण्डमा संलग्न भएको देखेर आत्मग्लानि मात्रै भएको छैन १७ हजार नेपाली नागरिकले दिएको बलिदान र त्यसको जगमा भएको महान जनयुद्धलाई नै कलंकित गर्ने काम भैरहेको महसुस गरेको छु,' उनले राजीनामा पत्रमा लेखेका छन्, 'माओवादी पार्टी गुटै गुटको महासंघमा रूपान्तरण हुनु ! १० वर्षे जनयुद्धको दौरान आफैंले उठाएको मुद्दाबाट च्युत हुँदै जानु र जनादेशिवपरीत सरकारमा रहनकै लागि पटक-पटक गठबन्धन फेरिरहने र देशलाई अस्थिरताको अध्यारो दिशातर्फ धकेलेको महसुस गरेको छु ! यस्तो अवस्थामा माओवादी पार्टीमा बसिरहन मेरो नैतिकताले दिएन ।'
माओवादीको असल नीति र क्रान्तिकारी नेतृत्वकै कारण आफूले सरकारी सेवाबाट विद्रोहगरी भूमिगत राजनीतिक यात्रामा जाने निर्णय गरेको उनले स्मरण गरेका छन् ।
