२५ जेठ २०८३, सोमबार
उपप्रधान एवं परराष्ट्रमन्त्री नारायणकाजी श्रेष्ठले भारतसँगको सम्बन्धलाई सरकारले उच्च महत्व दिएको बताएका छन् । भारतसँग गम्भीर प्रकारले र हार्दिकताका साथ छलफल गर्न चाहेको उनले बताए ।
हालै सम्पन्न चीन भ्रमणबारे बुधवार प्रतिनिधि सभा बैठकलाई सम्बोधन गर्ने क्रममा मन्त्री श्रेष्ठले भारतमा लोकसभा चुनावको तयारी भइरहेकोले त्यसअघि उच्चस्तरको भ्रमणको परिस्थिति नभएको बताए । ‘हाम्रो दुई छिमेकी सँगको सम्बन्ध प्राथमिकताको विषय भएको मैले संसद्मा यसअघि पनि बताएको छु । उत्तरी छिमेकी चीनजस्तै भारत हाम्रो अर्को महत्वपूर्ण छिमेकी हो, भारतसँगको सम्बन्धलाई प्राथमिकतामा राखेका छौं, महत्व दिन्छौ’ मन्त्री श्रेष्ठले भने ।
तीव्र विकासको पथमा अगाडि बढिरहेको भारतसँग आर्थिक साझेदारी बढाएर लाभ लिन सक्नु पर्ने मन्त्री श्रेष्ठले बताए । ‘हामीले छिमेकी मित्रराष्ट्र भारतसँग समझदारी गर्नुपर्नेछ । भारतमा लोकसभा चुनावको तयारी भइरहेको छ, चुनाव सम्पन्न हुने क्रममा छ । अहिले नै यही स्तरको भ्रमण गर्न निर्वाचन अगाडि उपयुक्त परिस्थिति नरहेको कुरा विदितै छ ।’
मन्त्री श्रेष्ठले भारतसँगको परम्परागत मैत्रीपूर्ण सम्बन्धलाई सुदृढ गर्दै कतिपय चासोका विषयमा कूटनीतिक तवरले छलफल गर्ने बताए । ‘भारतसँग गम्भीर प्रकारले, हार्दिकताका साथ छलफल गर्न चाहन्छौं । एकतिर परम्परागत मैत्रीपूर्ण सम्बन्धलाई सुदृढ बनाउने काम गर्नुछ । साथै नेपालको आर्थिक विकासलाई सहयोग पुग्ने गरी सम्बन्ध विस्तार गर्छौं’ उनले भने ।
मन्त्री श्रेष्ठले दु्ई छिमेकीबीचको सम्बन्धलाई दुवैले आन्तरिक घरेलु राजनीतिका मुद्दा नबनाएर खुला ढंगले छलफल गरेर कूटनीतिक माध्यमद्वारा समाधान गर्न सकिने बताए ।
त्यसक्रममा मन्त्री श्रेष्ठले चैत ११ देखि १९ गतेसम्म सम्पन्न चीन भ्रमणले दिपक्षीय सम्बन्धलाइ सुद्रिढ बनाउने काम गरेको बताए । ‘आर्थिक विकास र समृद्धिलाई अगाडि बढाउने सम्बन्धमा चीनबाट कसरी लाभ लिन सक्छ भनेर छलफल गरेको छु । कोभिडका कारण बन्द भएका १४ वटा परम्परागत व्यापार नाका यथाशीघ्र खोल्न चीन तयार भएको छ’ मन्त्री श्रेष्ठले भने ।
चीनले नेपालसँगको कूटनीतिक महत्व दिदै आएको आफूले भेट गरेका नेताहरूले बताएको मन्त्री श्रेष्ठले बताए । ‘मेरो भ्रमणले नेपाल र चीनबीचको आपसी सम्बन्ध थप गहिरो भएको, नेपाल र चीनबीच सद्भावनाले थप उचाइ उचाइ भएको ठानेको छु’ उनले भने ।
