१० साउन २०८३, आइतबार
सत्तापक्षका सांसदहरूले सहकारी पीडितको पक्षमा नबोलेको भन्दै कांग्रेसकी एक सांसदले कटाक्ष गरेकी छिन् ।
बुधवार बसेको प्रतिनिधि सभा बैठकको विशेष समयमा कांग्रेस सांसद सीता मिजारले सत्तापक्षका सांसदले सहकारी ठगी गर्नेलाई कारबाही होस् भनेर कसैले बोलेमा रेकर्ड हटाइदिनु भनेर व्यंग्य गरेकी हुन् ।
‘सभामुख महोदय, सत्तापक्षको रोमा बस्ने कुनै सांसदले सहकारी पीडितको पक्षमा, ठगी गर्नेलाई कारबाही होस् भनेर बोल्नुभयो भने संसद्को रेकर्डबाट हटाइदिन आग्रह गर्न चाहन्छु’, सांसद मिजारले भनिन् ।
संसद्मा केही असंसदीय शब्द बोलेमा रेकर्डबाट हटाउने परम्परा छ ।
सहकारी ठगीमा मुछिएका उपप्रधान एवं गृहमन्त्री रवि लामिछानेमाथि संसदीय छानबिनको माग गर्दै कांग्रेसले संसद्मा निरन्तर प्रश्न उठाइरहेको छ ।
