लुम्बिनी प्रदेशमा नयाँ सरकार गठनका लागि नेकपा (माओवादी केन्द्र)का जोखबहादुर महराले दाबी पेश गरेका छन् ।

डिल्लीबहादुर चौधरीले बिहीबार पदबाट राजीनामा दिएपछि शुक्रवार महराले प्रदेश प्रमुखसमक्ष मुख्यमन्त्रीमा दाबी पेश गरेका हुन् ।

नयाँ गठबन्धन दलका नेताहरूले प्रदेश प्रमुख अमिक शेरचनको कार्यालयमा पुगेर ४४ सांसदको हस्ताक्षर बुझाएको एमाले प्रमुख सचेतक तुलसी चौधरीले जानकारी दिए । 

एमालेका २९, माओवादीका १०, जसपाका ३, एकीकृत समाजवादी १ र १ जना स्वतन्त्र प्रदेशसभा सदस्यले महराको पक्षमा हस्ताक्षर गरेका छन् ।

संविधानको धारा १६८ को उपधारा २ बमोजिम प्रदेश मन्त्रिपरिषद् गठन प्रक्रिया शुरू भएको हो ।

प्रदेशसभामा कुनै पनि दलको स्पष्ट बहुमत नरहेको अवस्थामा प्रदेश सभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई प्रदेश प्रमुखले मुख्यमन्त्री नियुक्त गर्ने प्रावधान छ । महरा रोल्पाबाट निर्वाचित सांसद हुन् ।

लुम्बिनी प्रदेशमा बहुमत पुर्‍याउन समर्थन गर्ने साना राजनीतिक दलसहित स्वतन्त्र सांसदलाई समेत सरकारमा सहभागी गराउने तयारी रहेको बताइएको छ ।