२२ जेठ २०८३, शुक्रबार
यही चैत्र २६ गते सोमवार सशस्त्र प्रहरी बलको बलम्बुस्थित केन्द्रीय स्टोरमा भएको आगलागी घटनाबारे छानबिन गर्न गठित आन्तरिक समितिले काम शुरू गरेको छ ।
आगलागीको घटनापछि कार्यविभाग प्रमुख सशस्त्र प्रहरी अतिरिक्त महानिरीक्षक बंशीराज दाहालको अध्यक्षतामा ९ सदस्यीय छानबिन समिति गठन गरिएको थियो । सो समितिले काम थालेको सशस्त्रका सहप्रवक्ता डीएसपी शैलेन्द्र थापाले जानकारी दिए ।
‘मंगलवार बिहानैदेखि घटनास्थललाई सिल गरेको छ भने सुरक्षाको लागि नयाँ टोली राखिएको छ,’ उनले भने ।
साथै आगलागीबाट क्षति भएका सामानको विवरण संकलन गर्ने कार्यसमेत तीव्ररुपमा अघि बढाइएको प्रवक्ता थापाले जानकारी दिए ।
‘प्रयोगमा ल्याउन मिल्ने सामान छुट्याएर सिल गरी सुरक्षित स्थानमा राखिएको छ । समितिले भण्डार महाशाखामा रहेको सम्पूर्ण सक्कल अभिलेखको अध्ययन गरी के–कति सामान रहको र कति क्षति भएको भन्ने विवरणसमेत संकलन गरिरहेको छ,’ उनले भने ।
यस्तै भण्डार महाशाखामा कार्यरत सशस्त्र प्रहरी उपरीक्षकसहित ७ जनालाई समेत भण्डारण गरिएको सामानको विवरण र अवस्थाबारे सोधपुछका लागि झिकाइएको छ ।
यसैगरी सशस्त्र प्रहरी बल, नेपाल नं. ९ पशुपतिनाथ बाहिनीबाट सुरक्षा जिम्मेवारीमा रहेका र त्यस दिनको ड्युटीमा रहेका सशस्त्र प्रहरी उपरीक्षकसहित ११ जना र नेपाल एपीएफ अस्पतालको सुरक्षा टोलीबाट मेनगेटमा खटिएका २ जनालाई समेत सोधपुछका लागि मुख्यालय झिकाइएको प्रवक्ता थापाको भनाइ छ ।
सो स्टोरको सुरक्षार्थ राखिएको सीसी क्यामेराको फुटेजसमेत समितिले अध्ययन गरिरहेको बताइएको छ । सो फुटेजमा भवनको बीचमा रहेको कोठाबाट सानो मात्रामा धुवाँ आएको केही सेकेण्डभित्र नै ठूलो मुस्लो देखिएको र बाहिनीभित्र रहेका सुरक्षाकर्मी तत्काल घटनास्थल पुगेको देखिएको छ । सो आगलागीबाट फ्रि–स्केलका सामान, विपद् उद्धारका सामानसमेत जलेर नष्ट भएका छन् ।
‘सशस्त्र प्रहरी बलको मुख्य स्टोर हलचोकमा रहेकोमा केही वर्षअघिदेखि शाखा स्टोरको रुपमा सो ठाउँमा जिन्सी सामान भण्डारण गरिएको थियो,’ प्रवक्ता थापाले भने, ‘केही फ्रि–स्केलका सामान भण्डारण गरिएको र त्यसको पूर्ण प्रक्रिया समाप्त नभएकोले मातहत कार्यालयमा पठाउने तयारीको अवस्थामा अचानक आगलागी भएकोले कर्मचारीको लागि वितरण गर्ने सामान जलेर नष्ट भएका छन् ।’
