२६ जेठ २०८३, मंगलबार
नेकपा एकीकृत समाजवादीका अध्यक्ष माधवकुमार नेपालले अहिलेको सत्ता गठबन्धनको भविष्य पनि अन्योलपूर्ण रहेको बताएका छन् ।
नरबहादुर कर्माचार्य स्मृति प्रतिष्ठानले सोमवार लतिपुरमा आयोजना गरेको कार्यक्रममा नेता नेपालले गठबन्धनमा सहजता महसुश नगरेको भन्दै यसको भविष्यलाई लिएर संशय व्यक्त गरेका हुन् ।
प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डसमेत सहभागी कार्यक्रममा नेपालले गठबन्धन कति दिन टिक्छ भन्ने प्रश्न उठिरहेको पनि बताए ।
‘नेपालको राजनीति जटिल छ । छोटो समयभित्र गठबन्धन ओल्टेकोल्टे गरेको छ । कति दिनसम्म यो गठबन्धन टिकिरहने हो भन्ने प्रश्न उठेको उठ्यै छ । त्यसको सबै जवाफ त प्रधानमन्त्रीज्युले दिनुहुनेछ मैले दिन सक्दिन,’ नेपालले भने, ‘तर पनि अलिअलि भन्न सक्छु । परिस्थिति सहज छैन । हामी सहज मानिरहेका छैनौं । सहज अवस्थामा आफूलाई अनुभूत गरिरहेका छैनौं ।’
अध्यक्ष नेपालले आफ्नो पार्टीप्रति सत्ता गठबन्धनबाटै अपमान भइरहेको टिप्पणी गरे ।
‘कसैका धाक, धम्की, कसैका गालीगलौज सुन्नका लागि हामी राजनीतिमा आएका होइनौं, कसैको दास बन्न हामी चाहँदैनौं’ नेपालले भने ।
आइतबारमात्रै नेता नेपालले आफूहरूलाई अपमान भए अर्को राजनीतिक उथलपुथल ल्याउने चेतावनी दिएका थिए ।
उनीपछि बोलेका प्रधानमन्त्री प्रचण्डले चुनौती भए पनि कम्युनिष्टहरू ढिलोचाँडो मिलेर जाने भन्दै नेपाललाई आश्वस्त बनाउन खाेजेका थिए ।
