नेकपा एमालेका महासचिव शंकर पोखरेलले अबको राजनीतिको दिशा के हो भन्ने कुरा उपनिर्वाचनले देखाएको बताए । जनताले रोजेको पार्टी एमाले हो भन्ने कुरा पुष्टि भएको उनको दाबी थियो ।

एमाले बर्दियाको १० औं अधिवेशनको मंगलवार उद्‌घाटन गर्दै महासचिव पोखरेलले भने, ‘२०७९ सालको चुनावमा पनि जनताले रोजेको पहिलो पार्टी एमाले थियो । संसद्‌मा नेपाली कांग्रेस पहिलो भयो, जनताले एमाले रोज्ने चुनावको परिणाम कांग्रेसको पक्षमा देखिने यो कस्तो लोकतन्त्र हो ?’​​

आफूले रोजेको पार्टीले सरकार चलाउन नपाएपछि जनता निराश भएको बताउँदै उनले अब एमालेले सरकारमा कुर्सीको भागबन्डामा भन्दा पनि २०८४ को चुनाव कसरी जनताको पक्षमा ल्याउन सकिन्छ भन्नेतर्फ ध्यान दिनुपर्ने बताए ।

आउने चुनावपछि एमाले आफ्नै एकल बहुमतको सरकार बनाउने सामर्थ्यमा पुग्नुपर्ने पोखरेलको भनाइ छ ।

उनले  एमाले जनताको आशा र भरोसको केन्द्रविन्दु भएको दाबी गरे ।

पछिल्लो समयमा जातीय राजनीति र नयाँ दलको नाममा एमालेलाई थोरै समस्या भएको बताउँदै महासचिव पोखरेलले उनीहरूको राजनीति सकिएको बताए ।

‘जातीय नाममा रेशम चौधरीले गरेको राजनीति अब सकियो । त्यसको उदाहरण पछिल्लो उपनिर्वाचन हो, जनताले पहिचानवादी र जातीय राजनीति रुचाउन छोडे’, उनले भने ।​

​उद्‌घाटनमा नेकपा एमालेका पोलिटब्यूरो सदस्य एवं बर्दिया इन्चार्ज लिला गिरीले जनताको रोजाइको पार्टी एमाले रहेको बताए ।

अधिवेशनको बन्दशत्र आज (मंगलवार) साँझ ८ बजेदेखि शुरू हुनेछ ।

३६४ जना प्रतिनिधि रहेको बन्दसत्रमा राजनीतिक प्रतिवेदन, आर्थिक प्रतिवेदन प्रस्तुत हुनेछ ।