वरिष्ठ गायिका ज्ञानु राणालाई 'दीर्घ साधना सम्मान' प्रदान गरिने भएको छ । चौथो हिमालयन अन्तर्राष्ट्रिय अवार्ड-२०८० अन्तर्गत आउँदो मंगलबार काठमाडौंमा हुने एक कार्यक्रममा उनलाई 'दीर्घ साधना सम्मान' प्रदान गरिने अवार्ड संयोजक गीता अधिकारीले जानकारी दिइन् । 

समारोहमा पत्रकार विजयरत्न तुलाधरलाई पत्रकारिता रजत सम्मान, शान्तिप्रियलाई विशेष पत्रकारिता सम्मान र विनोद देवकोटालाई पत्रकारिता सम्मान अर्पण गरिने निर्णय भएको अवार्डका अध्यक्ष गणेश सुवेदीले जानकारी दिए । 

‘भाषा, साहित्य, कला संस्कृतिका सर्जकको सम्मान, हाम्रो एक अभियान’भन्ने मूल नाराका साथ आयोजना गर्न लागिएको चौथो संस्करणको यो अवार्डमा गीत संगीत विशेष सम्मानबाट जीवन शर्मा (सिक्किम) र चलचित्र विशेष सम्मानबाट अभिनेत्री रुश्मा राई (सिक्किम)लाई पनि सम्मान गरिने अध्यक्ष सुवेदीले जानकारी दिए ।

वुमेन्स एरा एण्ड मिडिया ग्रुप नेपालले आयोजना गर्ने हिमालयन अन्तर्राष्ट्रिय अवार्डको चौथो संस्करणका लागि आवेदन दिएका गीत संगीतका विविध विधामा उत्कृष्ट पाँच यसअघि सार्वजनिक गरिएको छ । अवार्डमा राष्ट्रिय भावका गीतसँगै आधुनिक, पप, लोकदोहोरी र भजन गीतलाई समावेश गरिएको छ ।

यसअघि दीर्घ साधना सम्मान वरिष्ठ संगीतकार राजु सिंह, गुरुदेव कामद र वरिष्ठ गायिका तथा संकलक चन्द्रकला शाहलाई प्रदान गरिएको थियो ।