०८ साउन २०८३, शुक्रबार
कोशी प्रदेशका मुख्यमन्त्री हिक्मतकुमार कार्कीले विश्वासको मत प्राप्त गरेका छन् ।
कांग्रेस अनुपस्थित रहेको प्रदेश सभा बैठकमा राप्रपाले भने तटस्थमा मतदान गरेको थियो ।
सोमवारको प्रदेश सभा बैठकमा कार्कीले ५७ मत पाएका हुन् । ६२ सांसद उपस्थित भएको बैठकमा ५ जना तटस्थमा देखिए । विपक्षमा भने शून्य मत खसेको थियो ।
९३ सदस्यीय प्रदेश सभामा बहुमतका लागि ४७ सांसद आवश्यक पर्छ ।
मुख्यमन्त्री कार्कीलाई नेकपा एमालेका ४०, माओवादी केन्द्रका १३, नेकपा (एकीकृत समाजवादी)को ३, जसपाको १ जना सांसदले गरी ५७ जना सांसदले पक्षमा मतदान गरेका छन् ।
नेकपा एकीकृत समाजवादीका नेता राजेन्द्र राई भने बैठकमा अनुपस्थित थिए ।
गत वैशाख २७ गते संविधानको धारा १६८ (५) अनुसार मुख्यमन्त्रीमा हिक्मतकुमार कार्की नियुक्त भएका हुन् ।
उनलाई मुख्यमन्त्रीमा नियुक्त गर्ने प्रक्रियाका विरुद्धमा निवर्तमान मुख्यमन्त्री केदार कार्कीले सर्वोच्च अदालतमा मुद्दा दर्ता गराएका छन् ।
उक्त मुद्दाको अन्तिम सुनुवाइको मिति जेठ ९ गतेलाई तोकिएको छ ।
