नेपाली कांग्रेसका महामन्त्री गगन थापाले बिहीवार संसद् बैठकका सभामुख देवराज घिमिरेको भूमिका नेताको आदेशपालक जस्तो देखिएको आरोप लगाएका छन् । पुरानो पार्टीको आबद्धता बिर्सेर तटस्थ भूमिका निर्वाह गर्न उनले माग गरे । 

बिहीवार प्रतिनिधिसभा बैठकमा झडपको स्थिति सिर्जना भएपछि संसद् भवनको ल्होत्से हलमा पत्रकार सम्मेलन आयोजना गरी महामन्त्री थापाले सभामुखको भूमिकामाथि प्रश्न उठाएका हुन् । 

‘सभामुख आज आफ्नो भूमिका निर्वाह गर्न चुक्नु भयो । दलगत आबद्धता बिर्सनु भयो । प्रतिपक्ष वेलमा पुगेको र उभिएको बेला संसदको कारबाही अगाडि बढाउनुले सभामुखको भूमिका निष्पक्ष देखिएन,’ उनले भने । 

बिहीवार संसदका अप्रिय अवस्थाको सिर्जना हुनुमा नेकपा (एमाले)का अध्यक्ष केपी शर्मा ओलीको समेत भूमिका रहेको थापाले आरोप लगाए । ‘एमालेका अध्यक्ष केपी ओलीले संसद चलाइन्छ भनेर हिजो हुंकार गर्नुभएको, त्यो पूरा गर्न सभामुख प्रयोग हुनुभयो । आजको जिम्मेवारी सभामुखले लिनुपर्छ । सभामुख नेताको आदेश पालकको भूमिकामा रहनु दुःखद कुरा हो,’ उनले थपे । 

कांग्रेस महामन्त्री थापाले निष्पक्ष र तटस्थ भूमिका निर्वाह गर्न सभामुखको ध्यानाकर्षण गराए । ‘निष्पक्ष भूमिका निर्वाह गर्न सभामुखलाई सचेत गराउँछाैँ । सत्तापक्षले मुठभेडमा लैजाने स्थिति सिर्जना गर्यो । सभामुखले निष्पक्ष भूमिका गर्नुभएको भए यस्तो हुने थिएन,’ उनले भने । 

कांग्रेसले नाराबाजी गरिरहेको समयमा सभामुखले उपप्रधान एवं गृहमन्त्री रवि लामिछानेलाई बोल्न दिएपछि संसदमा मुठभेडको स्थिति सिर्जना भएको थियो ।