सहकारी प्रकरणमा छानबिन समिति गठनको विषय थप पेचिलो बनेका बेला प्रमुख प्रतिपक्षी नेपाली कांग्रेसले थप धारणा तय गर्न संसदीय दलको बैठक राखेको छ । बैठक केहीबेर अगाडि मात्रै बानेश्वरस्थित संसद् भवन परिसरको ल्होत्से हलमा शुरू भएको हो । 

कांग्रेसले लामो समयदेखि सहकारी ठगीमा गृहमन्त्री रवि लामिछानेको संलग्नता रहेको भन्दै उनीमाथि छानबिन हुनुपर्ने माग गर्दै आएको छ । 
यसैले समिति गठन गर्नुअघि टीओआरको विषयमा छलफल गर्न बसेको सत्तापक्ष र विपक्षको बैठक निष्कर्षविहीन भएको थियो । छानबिन गर्दा रवि लामिछानेको नाम उल्लेख नगर्ने सत्तापक्ष र नाम उल्लेख गर्नुपर्ने विपक्षीको मागबीच सहमतिनजिक पुगेर पनि समिति गठनको विषय अलपत्र परेको हो । 

कांग्रेसले संसद्‌मा बोल्न गृहमन्त्री रवि लामिछानेलाई अवरोध गरेन । तर, आफूहरू उदार भए पनि गृहमन्त्रीले छानबिनमा सघाउनुको सट्टा उल्टै नेता विशेषलाई आरोपित गर्ने र लाञ्छना लगाएकोप्रति पनि कांग्रेस महामन्त्री गगन थापाले आपत्ति जनाएका छन् । 

छानबिनबाट भाग्न रविले अनर्गल प्रचार गरेका भन्दै थापाले पत्रकार सम्मेलन गरेरै समिति फेस गरेर निर्दोष सावित हुन चेतावनी दिएका छन् ।
 
आजै प्रधानमन्त्रीले संसद्‌मा विश्वासको मत लिने तयारी गरेका छन् । तर सहकारी प्रकरणमा छानबिन समिति गठन नगरेसम्म संसद् बैठक चल्न नदिने तयारीमा कांग्रेस छ ।