१२ साउन २०८३, मंगलबार
मधेश प्रदेशमा जनमत पार्टीको नेतृत्वमा सरकार गठन गर्न तीन दलबीच सहमति भएको छ ।
बिहीबार काठमाडौंमा बसेको बैठकले जनमतसँगै नेकपा (एमाले) र नेकपा (माओवादी केन्द्र)बीच यस्तो सहमति गरेको हो ।
जनमतका अध्यक्ष डा सीके राउतको उपस्थितिमा बसेको बैठकले मन्त्रालय बाँडफाँट आपसी सहमतिमा गर्ने निर्णयसमेत गरेको छ ।
उनीहरूबीच भएको लिखित सहमतिमा तीन दलका नेताहरूले हस्ताक्षर गरेको सहमति पत्र डा राउतले सामाजिक सञ्जालमार्फत जानकारी दिएका छन् ।
सहमति पत्रमा नेकपा (एकीकृत समाजवादी) र लोकतान्त्रिक समाजवादी पार्टीको नामसमेत समावेश भएपनि उनीहरूका प्रतिनिधिले भने हस्ताक्षर गरेका छैनन् ।
मधेश प्रकरणलाई लिएर प्रमुख प्रतिपक्षी दल नेपाली कांग्रेसका सभापति शेरबहादुर देउवाले बुधबार बोलाएको बैठकमा सत्तारुढ दल एकीकृत समाजवादीका अध्यक्ष माधवकुमार नेपाल, जसपा नेपालका अध्यक्ष उपेन्द्र यादव र लोसपाका अध्यक्ष महन्थ ठाकुर सहभागी थिए ।
उनीहरूले पनि मधेशमा जसपा नेतृत्वको सरकार जोगाउने कसरत गरेका थिए । मधेश राजनीतिमा एकीकृत समाजवादी र लोसपा तानातानमा परेको देख्न सकिन्छ ।
