१९ असार २०८३, शुक्रबार
लुम्बिनी प्रदेश योजना आयोगको उपाध्यक्षमा सरोज खनालले पद तथा गोपनीयताको शपथ लिएका छन् ।
उनलाई आज मुख्यमन्त्री जोखबहादुर महराले शपथ गराएका हुन् ।
शुक्रबार बसेको लुम्बिनी प्रदेश मन्त्रिपरिषद्को बैठकले खनाललाई नियुक्ति गरेको थियो । खनालले यसअघि प्रदेश योजना आयोगको सदस्य भएर पनि काम गरेका थिए ।
कपिलवस्तुको बाणगङ्गा नगरपालिका–८ निवासी खनालले गएको वर्ष भदौमा नियुक्त भएर चैतसम्म काम गरे ।
उनीसँग यसअघि चक्रपाणि खनाल संघीय सरकारको कृषिमन्त्री हुँदा स्वकीय सचिव भएर काम गरेको अनुभव छ भने सहकारी, शिक्षा, गैरसरकारी संस्थामा लामो समय काम गरेको अनुभव छ ।
सल्लाहकारमा आचार्य, अर्थ विज्ञमा बैद्धिक
यस्तै प्रदेशका मुख्यमन्त्री महराको राजनीतिक सल्लाहकारमा दाङका निर्मल आचार्यलाई नियुक्त गरिएको छ ।
माओवादी केन्द्रका दाङ जिल्ला इन्चार्ज समेत रहेका आचार्यलाई मुख्यमन्त्री महराको सचिवालयमा रहने गरी नियुक्त गरिएको हो । उनले राज्यमन्त्री सरहको सेवासुविधा पाउनेछन् । आचार्यले आज पदभार ग्रहण गरेका छन् ।
अर्थ तथा विकास विज्ञमा तुलसीपुरका सुशान्त बैद्धिक नियुक्त भएका छन् । उनी यसअघिका मुख्यमन्त्री डिल्ली चौधरीको अर्थ विज्ञका रुपमा कार्यरत थिए ।
बैदिकले लन्डन स्कूल अफ इकोनोमिक्स एन्ड पोलिटिकल साइन्सबाट अर्थशास्त्रमा स्नातकोत्तर गर्नुभएको छ ।
उनीसँग लन्डनकै एक इकोनोमिक कम्पनीमा अर्थशास्त्रीका रूपमा काम गरेको अनुभव छ ।
