अफगानिस्तानका दुई मस्जिदमा भएको आत्मघाती हमलामा ७२ भन्दा बढीको मृत्यु भएको छ । पहिलो हमला राजधानी काबुलको शिया मस्जिदमा भएको थियो, जहाँ एक आत्मघाती हमलाकारले शुक्रवार साँझको नमाजका बेलामा आफैलाई विस्फोट गरेर उडाएका थिए । उक्त हमलामा ३९ व्यक्तिले ज्यान गुमाए र अन्य केही घाइते भएका थिए । नमाजमा महिला र बच्चा पनि सहभागी थिए ।
काबुल प्रहरीका प्रवक्ता मोहम्मद इकबालल निजामीले आत्मघाती हमला गर्नेले दश्त ए बार्ची मस्जिदमा नमाजका बेला हमला गरेको बताएका छन् । पुलिसले शुरुमा इमाम जमां मस्जिदमा एक बन्दुकधारीले हमला गरेको बताएका थिए । दोस्रो हमला घोर प्रान्तको एक सुन्नी मस्जिदमा भएको थियो ।
प्रान्तीय पुलिसले बताएअनुसार उक्त मस्जिदमा नमाजका बेला विस्फोट हुँदा ३३ जनाको मृत्यु भएको थियो । अहिलेसम्म कुनै पनि संगठनले हमलाको जिम्मेवारी लिएका छैनन् । पछिल्ला दिनमा तालिबान समूहले कैयन् हमला गरेका छन् ।
