उपप्रधानसहित सरकारमा सहभागी हुन सीके राउतलाई प्रचण्डको प्रस्ताव, जनमत अनिर्णित

प्रधानमन्त्री पुष्पकमल दाहाल 'प्रचण्ड' नेतृत्वको सत्ता गठबन्धनले जनमत पार्टीका अध्यक्ष डा. सीके राउतलाई सरकारमा सहभागी हुन आग्रह गरेको छ ।

प्रधानमन्त्री प्रचण्ड र नेकपा एमालेका अध्यक्ष केपी शर्मा ओलीले राउतलाई सरकारमा सहभागी हुन आग्रह गरेका हुन् ।

स्रोतका अनुसार उपप्रधानसहित कुनै मन्त्रालय लिएर सरकारमा सहभागी हुन राउतलाई प्रस्ताव गरिएको छ । जनमत पार्टीकी सांसद अनिता साहले राउतलाई सरकारमा सहभागी हुन प्रस्ताव गरिएको तर अहिलेसम्म पार्टीले कुनै निर्णय नगरेको लोकान्तरलाई जानकारी दिइन् ।

‘सत्ता गठबन्धनका शीर्ष नेताबाटै डा’सापलाई नै सरकारमा सहभागी हुन प्रस्ताव आएको छ, हाम्रो तर्फबाट अहिलेसम्म कुनै निर्णय भएको छैन’ केन्द्रीय सदस्यसमेत रहेकी पूर्वमन्त्री साहले भनिन् । प्रचण्ड सरकारमा यसअघि जनमत पार्टीको तर्फबाट अब्दुल खान र अनिता साह सहभागी भएका थिए ।

नागरिक उन्मुक्ति पार्टीलाई समेत समेटेर प्रचण्डले मन्त्रिपरिषद् पुनर्गठनको तयारी गरिरहेको छन् । उपेन्द्र यादव सरकारबाट बाहिरिएपछि उनको रिक्तता पूर्तिका लागि सीके राउतलाई सरकारमा सहभागी गराउन प्रचण्डले जोडबल गरेका हुन् । २०७९ मंसिरको चुनावमा राउतले यादवलाई हराएका थिए ।

जनमत पार्टीका अध्यक्ष राउत अहिलेसम्म सरकारमा सहभागी भएका छैनन् । ‘सांसद बन्ने बित्तिकै मन्त्रीका लागि बार्गेनिङ गर्ने सत्तामुखी प्रवृत्तिमा नलाग्ने’ भन्दै राउत यसअघि सरकारमा गएका थिएनन् ।

प्रचण्ड सरकारलाई समर्थन गरेपछि जनमतले मधेशमा मुख्यमन्त्री पाएको छ ।

प्रतिनिधि सभामा जनमतका ६ सांसद छन् ।