आज मुस्लिम धर्मालम्बीहरुको महान पर्व बकर इद (इदुल जोहा)का अवसरमा सरकारले सार्वजनिक बिदा दिएको छ । सार्वजनिक बिदा भए पनि जिल्ला प्रशासन कार्यालय भक्तपुरको कोठा नं ८ मा प्रमुख जिल्ला अधिकारी रोशनीकुमारी श्रेष्ठ सेवाग्राहीको सेवामा व्यस्त देखिन्थिन्।

दिउँसो ३ बजे हामी त्यहाँ पुग्दा प्रजिअ श्रेष्ठ आफ्नो कार्यकक्षमा छाडेर कोठा नं ८ मा सेवाग्राहीको सेवामा व्यस्त थिइन् । यसअघि सार्वजनिक बिदामा दुई÷चार जना सेवाग्राही मात्रै आउँदा कर्मचारी यत्तिकै बस्नुपर्नेमा आज भने एकैदिन एक सय ५० भन्दा बढी सेवाग्राही आएको उनले जानकारी दिइन् ।  

गृह मन्त्रालयले विसं २०७९ चैत २ देखि राजपत्रमा सूचना प्रकाशित गरी १८ प्रकारका सार्वजनिक बिदाका दिनमा पनि अत्यावश्यकीय सेवा प्रवाह गर्ने सरकारी कार्यालय खोल्ने निर्णय गरेको थियो । 

राष्ट्रिय परिचय पत्रदेखि राहदानीका लागि सेवाग्राही बिहान ७ बजे नै लाइनमा बस्न आउने भएपछि कार्यालयले टोकन प्रणाली लागू गरेको थियो । राष्ट्रिय परिचयपत्र बनाउने सेवाग्राहीका लागि कार्यालयले दैनिक एक सय जनाका दरले असार १२ गतेसम्मका लागि टोकन वितरण गरिसकेको छ । 

कार्यालयमा आज प्रजिअ श्रेष्ठ, सहायक प्रजिअ डोरेन्द्र निरौला, प्रशासकीय अधिकृत अशोककुमार पोखरेललगायत १४ जना कर्मचारीले सेवा प्रवाह गरेका थिए । रासस