नेपाली कांग्रेसका सांसद मोहनबहादुर बस्नेतले अनावश्यक राजनीतिक हस्तक्षेप हुँदा एयरपोर्ट पुगेका खेलाडी फर्किने र अर्को विदेश उड्ने घटना धेरै भएको बताएका छन् ।

प्रतिनिधि सभाको बैठकमा बुधबार युवा नेता खेलकुद मन्त्रालयको बजेटमाथिको छलफलमा भाग लिँदै पटक-पटक मन्त्री भइसकेका बस्नेतले यस्तो बताएका हुन् । 

‘अनावश्यक राजनीतिकरण भएको छ । जसले खेलाडीलाई निरुत्साहित गरेको छ । पहिले-पहिले एयरपोर्टमा पुगिसकेको खेलाडी फर्किने र अर्को मान्छे विदेश जाने घटना धेरै भएको छ,’ बस्नेतले भने, ‘खेलकुद परिषद्‌मै स्वायत्त हुँ भन्ने, खेलकुद मन्त्री निरीह भन्ने संघहरू आफ्नै ठाउँमा उफ्रिने काम भएको छ । यी गडबडीले पनि खेलाडीलाई निरुत्साहित गराएको छ ।’

नेपालले कुन खेलमा नतिजा दिन सक्छ त्यसमा बढी लगानी गर्नुपर्ने उनले बताए । 

‘कुन कुन मेडल जित्न सक्छ त्यो हेर्नुपर्छ  टिमवर्कमा सुधार भएको छ भन्ने क्रिकेटले देखाएको छ । मार्सल आर्ट्समा भारतपछि हामी अगाडि छौं । सरकारले पनि वातावरण दिनुपर्छ’ उनले भने । 

प्राइभेट सेक्टरले सहयोग नगर्ने हो भने नेपालको खेलकुद क्षेत्र अपांग हुने पनि उनले बताए ।