०२ साउन २०८३, शनिबार
रुपन्देहीको आवास इण्डष्ट्रिज प्रालिले यस वर्षको नवप्रवर्तनकारी उद्यमी पुरस्कार प्राप्त गरेको छ ।
बिहीबार काठमाडौंमा आयोजित एक समारोहमा उद्योग वाणिज्य तथा आपूर्तिमन्त्री दामोदर भण्डारीले उद्योगका सञ्चालक यज्ञश्वरप्रसाद थैवलाई २ लाख नगद राशीसहित पुरस्कार प्रदान गरेका हुन् ।
नवीन सोच र प्रविधिको प्रयोग गर्दै नवप्रवर्तनका माध्यमबाट नेपालको औद्योगिक विकासमा उल्लेखनीय योगदान पुर्याएको भन्दै मन्त्रालयले उक्त पुरस्कार प्रदान गरेको हो ।
आवास इण्डष्ट्रिज रुपन्देहीको देवदहमा सञ्चालित छ ।
देवदहमा आवास इण्डष्ट्रिज सञ्चालन गरेका निर्माण काठमाडौं गएपछि देवदहको उद्योग यज्ञश्वरकी छोरी याचना थैवले सम्हाल्दै आएकी छन् ।
उनी व्यवस्थापनमा स्नातकोत्तर (एमबीए) गरेकी छन् ।
विक्रम संवत् २०७६ मा कोरोना महामारी फैलिरहेका बेला आवास ग्रुपले देवदहको भलुहीमा कुर्सी उद्योग स्थापना गरेको थियो ।
हरेक वर्ष चीनबाट अरबौंका कुर्सी-टेबललगायतका फर्निचर सामग्रीहरू नेपाल आयात भइरहेका बेला कम्पनीका दोस्रो पुस्ता निर्माण थैवले चिनियाँ कम्पनीहरूसँग प्रतिस्पर्धा गर्न आवास इण्डष्ट्रिज स्थापना गरेका थिए ।
उद्योग स्थापनाको पाँच वर्षको अवधिमै नेपालभर ब्रान्ड स्थापित गरेका थैवले पछिल्लो चार महिनादेखि काठमाडौंको नैकापमा पनि आवास इण्डष्ट्रिज प्रालिको शाखा सञ्चालनमा ल्याएका छन् ।
स्कूल, क्याम्पस, होटल, पार्टी प्यालेसलगायतका क्षेत्रबाट ठूलो परिमाणमा कुर्सी-टेबल, झुलालगायतका सामग्रीहरूको माग आएपछि काठमाडौंबाटै उत्पादन शुरू गरेको निर्माणले बताए ।
आवास इण्डष्ट्रिजले रुपन्देही र काठमाडौंमा गरी दैनिक १ हजार बढी कुर्सी तथा अफिस सामग्री उत्पादन गरी बजार पठाउने गरेको यज्ञश्वरले जानकारी दिए ।
आवास इण्डष्ट्रिजले रुपन्देही र काठमाडौंमा गरी २५० भन्दा बढीलाई रोजगारी दिएको उनले बताए ।
