२१ जेठ २०८३, बिहीबार
नेपाली कांग्रेससँग सत्ता सहकार्य गर्ने सहमति भएसँगै नेकपा एमालेका मन्त्रीहरूले राजीनामा दिने भएका छन् । कांग्रेस-एमालेबीच सत्ता सहकार्य गर्ने सहमतिपछि आज उनीहरूले राजीनामा दिने तयारी गरेका हुन् ।
उनीहरूले राजीनामा बुझाउने तयारी गरिरहेको एमालेकै एक मन्त्रीले जानकारी दिए । एमालेबाट सरकारमा आठ मन्त्री छन् ।
संसद्का दुई ठूला दल नेपाली कांग्रेस र नेकपा एमालेबीच गएराति नयाँ सत्ता समीकरण बनाउने समझदारी भएको थियो ।
संविधान संशोधन, निर्वाचन प्रणालीमा सुधारसहित अर्थतन्त्र सुधारमा काम गर्ने प्रतिवद्धतासहित एमाले अध्यक्ष केपी शर्मा ओली र कांग्रेस सभापति शेरबहादुर देउवाले सोमबार राति सहमति पत्रमा हस्ताक्षर गरिसकेका छन् ।
सहमतिसँगै प्रचण्ड सरकार ढल्ने निश्चित भएको छ । एमालेका मन्त्रीहरूले राजीनामा दिएपछि प्रधानमन्त्री प्रचण्डले मार्गप्रशस्त गर्ने कांग्रेस-एमालेको विश्वास छ ।
संसद्मा तेस्रो दलका रूपमा रहेको माओवादीका जम्मा ३२ सिट भए पनि दुई ठूला दललाई प्रयोग गरेर प्रचण्डले सत्ता टिकाइरहेका थिए । सरकार टिकाउन उनले समीकरण फेरेको फेर्यै गरिरहेका थिए । डेढ वर्षको कार्यकालमा उनले चारपटक त विश्वासको मत नै लिए ।
२०७९ पुन १० मा तत्कालीन समीकरण फेरेरै उनी प्रधानमन्त्री बनेका थिए । त्यसपछि उनले एकपटक कांग्रेस र फेरि एकपटक एमालेसँगै सहकार्य गरेर सत्ता टिकाइरहेका थिए ।
