सम्पत्ति शुद्धीकरण अनुसन्धान विभागले देव विकास बैंकका तत्कालीन प्रबन्धक समीर बुढाथोकीविरुद्ध १८ करोड ३ लाख ७२ हजार रुपैयाँको मुद्दा दायर गरेको छ ।

विभागले सोमबार जिल्ला सरकारी वकिल कार्यालय दाङमार्फत उच्च अदालत तुलसीपुरमा अभियोग पत्र दायर गरेको हो ।​

बुढाथोकीले साबिक वेष्टर्न डेभलपमेन्ट बैंकको कोषमा रहेको रकम अपचलन गरेको पाइएको विभागले जनाएको छ ।

यस्तै, उनले रकम अपचलन गर्ने मनसायले बैंकका अन्य कर्मचारीको युजर आईडीसमेत प्रयोग गरेको पाइएको छ ।

उक्त प्रकरणमा उनीमाथि बैंकिङ कसुर मुद्दामा ७ वर्षको कैद सजाय समेत भइसकेको विभागद्वारा जारी विज्ञप्तिमा उल्लेख छ ।​​

बुढाथोकीले ३६ वटा कृत्रिम कर्जा खाता खोली उक्त खाताबाट आफैंले सम्पूर्ण कर्जा रकम रकमान्तर गर्ने गरेका थिए ।

गैरकानूनी स्रोत लुकाउने मनसायले कर्जा सीमा १७ करोड ९९ लाख ९० हजार रुपैयाँ कायम गरी उक्त रकमलाई आफैंले खोलेका विभिन्न खातामा ट्रान्सफर गरेका थिए ।

उक्त बैंकिङ कसुरबाट उनले बैंकको १८ करोड ३ लाख ७२ हजार रुपैयाँ अपचलन गरेको विभागको अनुसन्धानबाट खुलेको छ ।