०५ साउन २०८३, मंगलबार
नेपाल भलिबल सङ्घले इन्फिनिटी ड्रिम्स प्रालिलाई एभरेष्ट महिला भलिबल लिग सञ्चालन गर्न अनुमति दिएको छ ।
शुक्रबार आयोजित पत्रकार सम्मेलनमा नेपाल भलिबल सङ्घका अध्यक्ष जीतेन्द्रबाहदुर चन्द र इन्फिनिटी ड्रिम्स प्रालिका प्रबन्ध निर्देशक आमिर अख्तरबीच उक्त प्रतियोगिता सञ्चालन गर्ने विषयबारे सम्झौतापत्रमा हस्ताक्षर भएको हो ।
सम्झौताअनुसार ड्रिम्सले ६ टोलीबीच फ्रेन्चाइज भलिबल लिग गराउने प्रालिका निर्देशक अख्तरले बताए ।
उनले भलिबलमार्फत महिला खेलाडीलाई सशक्तीकरण गर्नुका साथै भलिबल खेलको विकास र विस्तारमा सहयोग पुर्याउने बताए । सो सम्झौता सात वर्षका लागि गरिएको हो ।
अध्यक्ष चन्दले इन्फिनिटी ड्रिम्सले गरेको सहयोगले भलिबल खेललाई व्यावसायिक रूपमा अघि बढाउन सहयोग पुग्ने बताए ।
लिगका माध्यमबाट खेलाडीलाई भलिबल खेलप्रति आकर्षित गर्न र अन्तर्राष्टियस्तरका प्रतियोगितामा खेल प्रदर्शन गर्न सहज हुने उनले विश्वास व्यक्त गरे ।
लिग शुरू हुने समय भने पछि तय गरिने सङ्घले जनाएको छ ।
