२२ असार २०८३, सोमबार
पृथ्वीराजमार्गअन्तर्गत तनहुँको शुक्लागण्डकी–७ शेराटारमा रहेको अस्थायी कल्भर्ड बाढीले बगाएपछि सवारी आवतजावत पूर्ण रूपमा बन्द भएको छ । जिल्ला प्रशासन कार्यालयले आज प्रेस विज्ञप्ति जारी गर्दै यस राजमार्ग भएर आवतजावत गर्ने सवारीसाधानले वैकल्पिक मार्ग प्रयोग गर्न आग्रह गरेको छ ।
शुक्रबार रातिदेखि परेको अविरल वर्षाका कारण म्याग्दे–६ र शुक्लागण्डकी–७ जोड्ने फेदीखोलामा आएको बाढीले कल्भर्ड बगाएपछि समस्या पैदा भएको प्रमुख जिल्ला अधिकारी जनार्दन गौतमले जानकारी दिए । राजमार्ग हुँदै यात्रा गर्ने सवारी चालक र सर्वसाधारणलाई वैकल्पिक मार्गको प्रयोग गर्न र सतर्कता अपनाउन अनुरोध गरिएको हो ।
सडक डिभिजन कार्यालयको समन्वयमा आइतबार पुनः कल्र्भट राखेर सवारीसाधान सञ्चालन गर्ने योजना रहेको तनहुँका प्रहरी नायब उपरीक्षक दीपककुमार रायले बताए ।
