२१ असार २०८३, आइतबार
प्रधानमन्त्री पुष्पकमल दाहाल प्रचण्ड पदमुक्त भएका छन् । शुक्रवार प्रतिनिधि सभा बैठकमा राखेको विश्वासको मतको प्रस्ताव अस्वीकृत भएसँगै नेकपा (माओवादी केन्द्र)का संसदीय दलका नेता प्रचण्ड प्रधानमन्त्रीबाट पदमुक्त भएका हुन् ।
शुक्रवार भएको मत विभाजनमा उपस्थित २५८ सांसदमध्ये प्रचण्डको पक्षमा ६३ र विपक्षमा १९४ मत परेको थियो । एक जना तटस्थ रहे । प्रचण्डको पक्षमा माओवादी केन्द्र, रास्वपा र नेकपा एकीकृत समाजवादीले मात्र मतदान गरेका थिए । प्रचण्डले माओवादीका ३२, रास्वपाका २१ र नेकपा एकीकृत समाजवादीको १० गरी ६३ सांसदको मात्रै समर्थन पाएका हुन् । २७५ सदस्यीय प्रतिनिधि सभामा बहुमतका लागि १३८ मत चाहिन्छ ।
नेपाली कांग्रेस, एमाले, राप्रपा लगायत दलले प्रचण्डको विपक्षमा मतदान गरे । त्यसअघि प्रतिनिधि सभामा प्रचण्डले विश्वासको मत माग्ने प्रस्ताव राख्दै सरकारले राम्रो काम गर्दा गर्दै सरकार ढालिएको आरोप लगाएका थिए । उनले संविधानको रक्षाका लागि आफूले संसदमा विश्वासको मत फेस गरेको दाबी गरेका थिए ।
एमालेको समर्थनमा २०७९ पुस १० गते प्रधानमन्त्री नियुक्त भएका प्रचण्ड एमालेले समर्थन फिर्ता लिएसँगै अल्पमतमा परेका थिए । उनले यही कार्यकालमा यसअघि चारपटक विश्वासको मत लिएका थिए ।
प्रचण्ड पदमुक्त भएसँगै नयाँ सरकार गठनको बाटो खुलेको छ । प्रचण्ड पदमुक्त भएको पत्र संसद् सचिवालयले पठाएसँगै राष्ट्रपति कार्यालयले नयाँ सरकार गठनका लागि आह्वान गर्ने तयारी गरेको छ ।
राष्ट्रपतिबाट सरकार गठन आह्वान भएमा कांग्रेस र एमालेले शुक्रवार नै राष्ट्रपति रामचन्द्र पौडेललाई बहुमत सांसदको हस्ताक्षर बुझाउने तयारी गरेका छन् ।
केपी शर्मा ओलीलाई प्रधानमन्त्री बनाउनेगरी कांग्रेस र एमालेबीच असार १७ गते सहमति भएको थियो ।
कांग्रेस एमालेले संविधानको धारा ७६ (२) अनुसार सरकार गठनका लागि आह्वान हुनुपर्ने बताएका छन् । माओवादीले भने धारा ७६ (३) को सरकार बन्नुपर्ने बताउँदै आएको छ ।
