२३ असार २०८३, मंगलबार
राष्ट्रपति रामचन्द्र पौडेलले संविधानको धारा ७६(२) अनुसार नयाँ सरकार गठनका लागि आह्वान गरेका छन् ।
प्रधानमन्त्रीले संसद्बाट विश्वासको मत नपाएपछि संविधानविद्सँग छलफल गरेका राष्ट्रपति पौडेलले शुक्रबार संविधानको धारा ७६(२) अनुसार सरकार गठनका लागि दलहरूलाई आह्वान गरेका हुन् ।
दाबी पेस गर्नका राष्ट्रपति पौडेलले असार ३० गते आइतबार साँझ ५ बजेसम्मको समय दिएका छन् ।
नेपालको संविधानको धारा ७६ को उपधारा (२) मा प्रतिनिधि सभामा प्रतिनिधित्व गर्ने २ वा २ भन्दा बढी दलहरूको समर्थनमा बहुमत प्राप्त गर्न सक्ने प्रतिनिधि सभाको सदस्यलाई नेपालको प्रधानमन्त्री पदमा नियुक्ति गर्ने प्रावधान छ ।
असार १७ गते नै नयाँ सरकार बनाउन सहमति गरेका कांग्रेस र एमालेले पनि ७६(२) अनुसार सरकार गठन गर्ने दाबी गर्दै आएका थिए ।
यी दुई दलबीच एमाले अध्यक्ष केपी शर्मा ओलीलाई प्रधानमन्त्री बनाउने समझदारी भइसकेको छ । सोही अनुसार कांग्रेस र एमालेले दुई तिहाइभन्दा बढी सांसदको समर्थनमा नयाँ सरकार गठनका लागि दाबी पेस गर्ने तयारी गरेका छन् ।
कांग्रेस र एमालेले ओलीलाई प्रधानमन्त्री बनाउन सांसदहरूको हस्ताक्षर जुटाइसकेका छन् ।
संविधानविद्हरूले पनि बहुमतीय प्रक्रियाबाट स्थिर सरकार बन्ने स्थितिमा संविधानको धारा ७६(३) मा जान नहुने सुझाव राष्ट्रपतिलाई दिएका थिए ।
प्रधानमन्त्रीको विश्वासको मतको पक्षमा ६३ मत पर्दा विपक्षमा १९४ सांसदको मत परेको थियो । जुन संसद्को दुई तिहाइभन्दा बढी मत हो ।
